АН-ын өнөөдрийн бүлгийн хурал дээр УИХ-ын Байнгын хороодын дарга нарыг солих асуудлыг хэлэлцжээ. Энэ үеэрЛ.Эрдэнэчимэг “хүсэл”-ээ биелүүлжээ.

Тэр өөрийгөө УИХ-ын Байгаль орчин, ногоон хөгжлийн байнгын хорооны даргад нэр дэвшүүлснийг бүлгийнх нь гишүүд дэмжжээ. Ингэснээр тэрбээр Байнгын хорооны дарга болох виз өвөрлөөд байна. Энэ тухай АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр твиттертээ жиргэв.

Өнгөрсөн зун АН, МАН-ын сайд нарыг Засгаас хөөж гаргаад шинэ сайд нарыг томилох болоход Л.Эрдэнэчимэг Зам тээврийн сайдад зүтгээд бараагүй билээ. Түүнийг Ч.Сайханбилэг хүлээж аваагүй юм. Тэгвэл энэ удаа ийнхүү дарга сайд сэтэр зүүх “хүсэл” нь Байнгын хорооны дарга болсноор хангагдах нь энэ.

УИХ-ын үйл ажиллагаа сүүлиийн үед сонгуулийн хуулиас болж нэлээд зогсонги байх болсон үед Л.Эрдэнэчимэг гишүүн нэлээд nдэвх зүтгэлтэй байгаа.

МоАХ фракцийн гишүүн тэрбээр өнгөрсөн хавраас Тавантолгойн нүүрсний ордыг ашиглах тухай асуудалтай нэр холбогдох болсон ба өнөө маргаашгүй энэ асуудлаараа УИХ-ын тогтоолын төслийг өргөн барихаар бэлдэж байгаа.

Бүр 11 дүгээр сарын эхээр 40 гаруй гишүүдийн гарын үсэг зурсан тогтоолын төслийг өргөн барьж, Засгийн газар нэг мөсөн нам авах юм мэдэгдсэн ч өдий хүртэл таг байсан нь гайхал төрүүлээд байсан. Тэгвэл энэ долоо хоногт УИХ-д өргөн барих сураг гарсан билээ.

Энэ тухайд Л.Эрдэнэчимэг “Одоогийн байдлаар тогтоолын төсөл болон хууль өргөн барихад тодорхой бичиг баримт бүрдүүлсэн байх шаардлагатай. Жишээ нь, төрийн бус байгууллагуудын саналыг авсан байдаг. Тэгэхээр төрийн бус байгууллагуудаас санал авахаар хоёр, гурван газар албан бичиг хүргүүлсэн. Энэ материал бүрдвэл дараагийн долоо хоногийн даваа юм уу, мягмар гараг гэхэд УИХ-ын дарга З.Энхболдод өргөн барихаар бэлдэж байна” гэсэн.

Ийнхүү Оюутолгойн далд уурхайн бүтээн байгуулалтад зарцуулах мөнгийг дэлхийн 20 том банкнаас зээлж, баярлаж бас гомдож янз бүр болж байгаа Монголчууд ирэх долоо хоногт Тавантолгойн асуудлаар ахин маргаан мэтгэлцээн өрнүүлж эхлэх нь.

Мөн Л.Эрдэнэчимэг үндэсний сурын цол чимгийг нэмэх тухай “Үндэсний баяр наадмын тухай хуульд өөрчлөлт оруулах төслийг санаачилсан тухайгаа ч ярьсан. Ийнхүү УИХ-ын гишүүн Л.Эрдэнэчимэг шуурхай ажиллаж байна.

М.Дэлгэр

Gereg.mn