Эхнэрээ хөнөөгөөд автомашиныхаа тэвшинд хийгээд явж байсан хэрэг дахин гарлаа. Тодруулбал, өнгөрсөн мягмар гарагт Чингэлтэй дүүргийн 15-р хорооны Хайлаастын хуучин эцсийн буудалд 02:05 цагийн үед хамтран амьдардаг эмэгтэйгээ хөнөөгөөд машиныхаа тэвшинд ачиж явсан этгээдийг саатуулжээ. Тэрээр тус дүүргийн хоёрдугаар хэлтсийн шөнийн эргүүлийн алба хаагчид автомашинуудыг зогсоож, согтууруулах ундааны зүйл хэрэглэсэн, бичиг баримтын зөрчилтэй эсэхийг нь шалгасан байна. Гэтэл “Toyota raum” маркийн автомашины жолооч 30 настай, Э гэх нь сэжиг бүхий байсан аж. Тиймээс жолоочийг машиныхаа тэвшийг онгойлгож үзүүлэхийг шаарджээ.
Энэхүү аймшигт хэргийг гурав хоногийн өмнө буюу энэ сарын 12-нд үйлдэж, цогцосыг нь нуун далдлахаар хотоос гаргахаар шийдээд явж байсан аж. Талийгаач А-ийн хувьд 29 настай, сэжигтэн Э-тэй хамтран амьдраад  удаагүй байжээ. Хүзүүн тус газраа хоёр удаа хутгалуулсан улмаас амиа алдсан байна.

Хэргийг цагдаагийн байгууллага шалгаж байгаа бөгөөд гэмт этгээд мэдүүлэг өгч эхэлсэн байна. Тэрбээр мэдүүлэгтээ “Бид хамт амьдраад таван сар болсон. Талийгаач А надаас гадна өөр олон эрчүүдтэй уулздаг байсан. Нэг бус удаа надад баригдаж байсан. Үүнээс болоод бид хоёрын дунд байнга хэрүүл гардаг байсан. Хэрэг гарах үед би согтуу байсан. Юу болсныг санахгүй байна. Нэг сэрсэн А цус алдчихсан байсан. Хүн алчихлаа гэж айсандаа байшингийнхаа дээвэрт нуучихсан. Шөнө эзгүй хээр аваачиж булах гэж байсан” хэмээжээ.