“Сэтгэшгүй” клиник сувиллын эмнэлэгт энэ оны дөрөвдүгээр сарын 07-нд 60 настай эмэгтэй, иргэн Д нас барсны улмаас тус эмнэлгийн эмчилгээ эрхлэх тусгай зөвшөөрлийг түдгэлзүүлэх шийдвэр гарсан билээ. Энэ асуудалтай холбогдуулан “Сэтгэшгүй” эмнэлгийн ерөнхий захирал С.Хүрэлбаатартай таван үг солилоо.

-Манай “Сэтгэшгүй” клиник сувилалд иргэн Д хэвтэн эмчлүүлж байгаад нас барсан. Гэтэл хэвлэл мэдээллийн хэрэгслүүдээр “Сэтгэшгүй” эмнэлгийнхэн хүн алсан мэтээр мэдээлэл цацагдаж, олон нийтэд буруу ташаа мэдээлэл их түгсэн.  Иймд зөв мэдээлэл өгөх зорилготой байна.

-Энэ хүн анх манайд ирэхдээ босч чадахгүй, ярьж чадахгүй хүнээр түшүүлж орж ирсэн. Би энэ хүнийг босгоно гэж хэлээд, хэлсэн үгэндээ ч хүрсэн. Хоёр, гуравхан хоногийн дараа энэ хүн өөрөө бие засдаг, хүүхдүүдээрээ түшүүлээд суудаг, хүнтэй ярьдаг болсон. Энэ бүхнийг хүүхдүүд нь гэрчилнэ.

-Өвчтөний  өөрийнх нь суурь өвчин хүндэрсэн тул нас барсан. 2015 оны дөрөвдүгээр сарын 08-ны өдрийн Шүүхийн шинжилгээний үндэсний хүрээлэнгийн Шүүх эмнэлгийн тогтоолоор иргэн Д нь нойр булчирхайн үхжилт, бөөрний сувганцарын хучуур эдийн үхжилт зэрэг олон суурь өвчтэй байсан нь тогтоогдсон.

Дөрөвдүгээр сарын 28-нд клиник оношийн дүгнэлт гарч, талийгаач Д нь эмч нарын буруутай үйл ажиллагаанаас болж нас бараагүйг нотолсон. Уг нь би олон хүнд буян болж, эмчилж эдгээж байсан, өргөсөн тангарагтаа үнэнч эмч хүн.  Гэтэл ийм асуудал гарсан нь надаар эмчлүүлж байсан хүмүүс болон эмчлүүлэхээр ирэх хүмүүст буруу ойлголт төрүүлэх хандлагатай байна. Иймд тэр хүмүүст зөв ойлголт төрүүлээсэй гэсэндээ хэвлэлийнхэнд хандсан юм.