Дөрөвхөн настай охиноо хөнөөсөн хэрэгт буруутгагдаад буй Т.Цогт, талийгаач охины хойд эх Г.Маралмаа  нарт холбогдох шүүх хурал өнөөдөр болсон. Шүүх хурал хэд хэдэн удаа хойшилсон бөгөөд өнөөдөр эхэлмэгц шүүгдэгч  Г.Маралмаа хурлыг хойшлуулах хүсэлт гаргасан боловч бүтэлгүйтсэн. Улмаар шүүх хурал 9 цаг үргэлжилсэний эцэст шүүх бүрэлдэхүүн Т.Цогтод  24 жил, Г.Маралмаад 24 жилийн хорих ял оноох шийдвэр гаргачээ. Гэмт хэрэгтнүүд болох Т.Цогт, Г.Маралмаа нарыг Эрүүгийн хуулийн тусгай ангийн 91.2.11, 91.2.12, 91.2.15, 100.1 гэх зүйл ангиар буруутган шүүлээ.

Тэд чанга дэглэмтэй хорих ангид ялаа эдлэх юм байна. Тодруулбал, талийгаач охины төрсөн эцэг болох Т.Цогтод 5 жилийн хорих ялыг гянданд, үлдсэн 19 жилийн хорих ялыг чанга дэглэмтэй хорих ангид эдлүүлэх шийдвэр гаргасан байна. Харин хойд эх Г.Маралмааг 24 жилийн чанга дэглэмтэй хорих ангид эдлүүлэхээр шийдвэрлэжээ. Г.Маралмаа нь өдгөө 9 сартай жирэмсэн ба түүний төрөх сүүлийн хугацаа энэ сарын 20-ний өдөр. Тэгсэн ч ялыг эдлүүлж, хүүхдийг нь хорих ангид хамт байлгаж байгаад 1 нас хүрэхээр нь асран хамгаалагч нарт нь өгөх гэнэ.

Эх сурвалж: Шуурхай.мн