Дотоодын зах зээлд 2015-2016 онд 30 орчим мянган тонн мах бэлтгэх боломжтой гэсэн тооцоо гарчээ. Махны нийлүүлэлтийг ирэх 12 дугаар сараас эхлэх юм байна. Мөн энэ хугацаанд үйлдвэрийн аргаар бэлтгэсэн 58 мянган тонн махыг гадаадад гаргах боломж байгааг холбогдох салбарын яам судалжээ. Энэ талаар УИХ-ын гишүүн, Монголын махны холбооны тэргүүн Д.Батцогт “Бид өмнөд хөршийн зах зээлд махаа гаргахыг зорьж байгаа. Юуны түрүүнд олон улсын судалгаа хийж байж гадагш гаргах нь зөв. Тиймээс БНХАУ, АНУ- ын махны холбоотой манай улсад уулзалт хийхээр болсон” хэмээн ярив. Мөн дотоодын мах нийлүүлэлтэд зориулж, аж ахуй нэгжүүдэд 80 орчим тэрбум төгрөгийн хөнгөлөлттэй зээл олгохоор ярилцаж байгаа юм байна.