УИХ-ын ээлжит бус чуулганаар Засгийн газрын зарим гишүүдийг томилох тухай асуудлыг хэлэлцэж дууслаа. Дөнгөж сая Хөдөлмөрийн сайдад нэр дэвшигч Г.Баярсайханыг томилох эсэх асуудлыг хэлэлцлээ.

Энэ үеэр УИХ-ын гишүүн Ө.Энхтүвшин “Хамгийн балмад хүн бол С.Эрдэнэ. Чи тэр тамгыг дараагийн сайдыг ирэх хүртэл манах ёстой хүн. Чи тэр хүмүүстэй ядаж нэг хоног ч гэсэн ажиллах ёстой. Хэн нь хэн болохыг ч мэдэхгүй. Ингэж Монгол төрийн сайдыг чи ингэж хийхгүй. Г.Баярсайхан гишүүн та зоригтой хүн. Энэ хууль бус асуудлыг өөрчилж өгч чадах уу” гэж асуусан юм.

Харин түүний асуултад нэр дэвшигч Г.Баярсайхан “Одоогийн байдлаар би бодитой тодорхой мэдээллийг гар дээр аваагүй байна. Олон нам засгийн эрхийг авч байгаа. Төрийн албан хаагч тогтвортой ажиллах ёстой. Хэрвээ хууль зөрчсөн юм байх юм бол би түүнийг засна” гэж хариуллаа.

Ингээд гишүүд санал хураахад хуралд оролцсон гишүүдийн олонхи нь Хөдөлмөрийн сайдаар Г.Баярсайханыг томилох нь зүйтэй гэж үзлээ.

Г.Ган