“Түшиг” их дэлгүүрийн эзэн Сүхээгийн хүү Г.Баттүшиг ээжийнхээ бизнесийг өргөжүүлэн “Улаанбаатар” их дэлгүүрийг барьсны зэрэгцээ хувийн амьдралаа төвхнүүлж, Монголын сайхан бүсгүйчүүдийн нэг Мөнгөнцэцэгийг эхнэр болгон авч Түшиг, Болд гэдэг хоёр хүүтэй болсон. “Улаанбаатар” их дэлгүүр нь Найрсаг Улаанбаатар дэлгүүр рекламаараа олны танил болоод байгаа. Саяхан “Найрсаг “Улаанбаатар” их дэлгүүрийн эзэд зан сайтай айл шиг нэг хөөрхөн реклам хийжээ. “Найрсаг “Улаанбаатар” их дэлгүүрийн урд зам засаж байна, зам засварынхандаа ажлын амжилт хүсье” гэсэн энгийн реклам инээд муутай хүнийг жуумалзуулж байна. Энэ нь “долигоноод” байгаа юм шиг боловч бас л амьдралтай реклам аж. Учир нь төв замаа засах гээд хаачихаар автобус, таксинууд тойрч давхиад, явган хүн бүдэрч уначих гээд алхаж чадахгүйн улмаас зам дагуу байрладаг “Улаанбаатар” их дэлгүүрийн үйлчлүүлэгчийн тоо цөөрч, ямартаа л аргаа барахдаа “Зам засварынхандаа амжилт хүсье. Найрсаг “Улаанбаатар” дэлгүүрээр заавал ороорой” гэх шахан рекламдаж суухав.
Өмнө нь “Улаанбаатар” их дэлгүүр “Төрийн түшээдээ, Монголдоо шоппинг хийцгээе” гэсэн реклам цацаад, эрхэм УИХ-ын гишүүдийг уурлуулж, уур омогтой зарим нь утсаар загнасан гэсэн. Гэхдээ энэ рекламд ч бас үнэний хувь бий. Гонконг, Сингапурт очоод онгоцноос буухаар өмнөөс бараа түрдэг тэрэгний цаанаас толгой нь цухуйхгүй их ачаа бараа овоолчихсон хүмүүс явдаг. Ерээд оны ганзагын наймаачид шиг яваа тэр хүмүүсийг тогтож харахаар УИХ-ын гишүүнээс эхлээд төрийн албан хаагчид, хурга төлгөн дарга л тэгж их ачаа зөөж явдаг. Тэгэхэд дэргэд нь бизнесмэнүүд ганцхан гар цүнхтэй онгоцонд ордог. Төрийн албан хаагчид, дарга сайд нар авлига авсан мөнгөө олны нүднээс нууж, Сингапур, Гонконгт очиж брэндийн бараанд үрэн, эхнэр хүүхдээ эрхлүүлдэг бололтой. Эдийн засаг хүнд байхад төрийн алба хашдаг эрхэм дарга нар, эвэртэн туурайтнууд нэгэнт төсвөөс идсэн мөнгөө эцсийн мөчид эх орондоо үлдээж, эндээс ганц хоёр эд бараа аван идсэн мөнгөө эргэлтэнд оруулмаар юм! Эцэст нь “Улаанбаатар” их дэлгүүрийн уриалсанчлан “Төрийн түшээдээ Монголдоо шоппинг хийцгээе”.