Хөдөө сум, аймаг, хот суурин гээд ер нь хаа л бол хэсэгхэн сайн дурын уран сайханчид байдаг даа. Ямар ч урилгагүй хэрнээ тайзан дээр гарчих гэж гүйгээд, эсвэл найрын хойморт суучих гээд байдаг. Хэрвээ тайзан дээр гаргачихвал дуулж чадахгүй. Бараг солгой хоолойтой хэрнээ их дуртай нөхөд байдаг шүү дээ, хаа газар. Нөгөө талаар огт боловсроогүй сэрүүн зүүдэлсэн сайн дурын уран сайханчид алийг тэр гэхэв ээ.

       Гэтэл энэ маань улстөрд олшрох төлөвтэй болчихлоо. Албан тушаал, айсуй сонгуулиар мандат горилсон бүлэг хүмүүс нэгдээд сайн дурын хамтлаг байгуулчихаж байгаа харагдах юм. Нөгөө талаас ийм дуртай урансайханчдыг ах нар нь турхирч, нийгмийн өнгөн дээр гаргаад байдаг бололтой юм. Өөрсдөө ил гарч болохгүй болохоор нь дарга нарынхаа өөдөөс нохой шиг тавьчихаад л инээж суудаг аж. Цаадуул нь ч “Нохойд барьдаг мод” болчихсон гэдгээ мэдэхгүй зангиа зүүж хоолой засаад л дайраад байхыг нь яана,аа.

     Тухайлбал, АН-ын шинэчлэлийн хөдөлгөөн гэж нэг сайхан дурын уран сайханчид байна,аа. Бүр нэг дуртай гарууд. Муусайн сайн дурынхны шинэчлэл хийнэ гэж юу байна вэ. Дүрдээ орчихсон нөхдийн албан тушаалын хэнээрхэлийг л ах нар олж харчихаад хөөргөөд байгаа хэрэг шүү дээ. Түүнээс биш тэдэнд мэдэх чадах юм байдаггүй нь илт.

      Миний санаж байгаагаар энэ “уран сайханчид” АН-ын 25 жилийн ойн баяртай зуузай холбох шахам гараад ирсэн. “Энэ намд шинэчлэл хэрэгтэй”, “Нам дотоод ардчилалгүй болчихлоо”. “Дарга цэргээ солино” гээд баярын хурал үймүүлснээр эхэлсэн санагдана. Уг нь шинэчлэл хийх гэж байгаа бол дарга нараа хөөх биш, эгэл гишүүдийнхээ дунд ажиллаж, тэдний санаа бодлыг сонсож нэгэн зорилгын дор хөдөлмөөр юм. Гэтэл тэд тэгсэнгүй. Сайн дурын уран сайханчид маань шууд л баярынхаа хурал дээр дарга нараа хөөж, улмаар удаа дараа хэвлэлийн хурал хийж, намынхаа хэдэн дарга нарыг л хэвлэлээр зүхээд байв. Ингэж лав шинэчлэл хийхгүй нь ойлгомжтой.

      Сайн дурын уран сайханчдын багт П.Галиндэв, Л.Наранбаатар, М.Мөнхжаргал, С.Мөнхбаатар, М.Алзахгүй, Э.Бямбацэрэн гээд жийгдчихсэн гарууд байдаг бололтой. Бас нэг аймгийн уяачдын холбооны тэргүүн ч нэмэгддэг шиг санагдаж байна. Эд нар яг л дээр дурдсан шиг тайзан дээр гарчих гээд солгойроод байгаа сайн дурынхан, өөр юу ч биш гэдгээ удаа дараа харууллаа. Гэтэл сайн дурынхан бүр ч оодров. З.Энхболд, Ч.Сайханбилэг, Л.Эрхэмбаяр нарын өмнөөс ажлыг нь хийгээд л яваад байх юм.

      Өнгөрөгч долоо хоногийн нам гүмийг эвдэж, сайн дурынхан МАН-ыг сөрөг хүчний үүргээ биелүүлж чадахгүй байгааг шүүмжлэн Засгийн газраас гарах ёстой гэв. Тэр сайн дурын зохицуулагч П.Галиндэв нь өөрийгөө ерөөсөө л АН-ын дарга, УИХ-ын дарга З.Энхболд гээд итгэчихсэн бололтой. Юу гэсэн гээч. “МАН-ыг сөрөг хүчний ажлаа хий хяналт тавьж ажилла гэдэг сонголт хийсэн. Гэвч шийдлийн Засгийн газар байгуулагдсанаар сөрөг хүчин МАН-тай хамтран эдийн засгаа босгож, олон жил ярьсан томоохон хуулиудыг батлах зорилтууд тавьсан боловч нэг ч ажил хийгдсэнгүй.”  Гэх зэргээр авч өгөв. Ерөөсөө л З.Энхболдын ажлыг шуудхан хийчих юм.

Н.Дөл