Энэ жилийн Үндэсний их баяр наадмын үеэр болох шоунд оролцуулахаар дуучин Жениффер Лопесыг нэг сая ам.доллар /хоёр тэрбум төгрөг/-аар урих болжээ” гэсэн мэдээлэл зарим хэвлэлд гарсан нь твиттер, фэйсбүүк хэрэглэгчдийн ярианы гол сэдэв болсон. Алдарт дуучныг өндөр үнээр урьж дуулуулж байгаа нь Монгол түмэнд таалагадахгүй байгаа учир хүчтэй эсэргүүцэлд тургарсан. Харин энэ их асуудлыг холливудын нэрт дуучин Жениффер Лопес ирэхгүй гэдгээ мэдэгдэж намжаасан. Гэхдээ алдарт дуучин манай улсад ирэхгүй ч гэсэн өөр нэртэй дуучид уригдсан тухай  БСШУ-ы дэд сайд Я.Төмөрбаатар ярихдаа “Энэ асуудал эцэслэн шийдэгдээгүй байгаа. Ерөнхий сайд Монголынхаа залуучуудад гадны дуучин урьж тоглуулна гээд мэдэгдчихсэн. Манай салбар комисс хэн ирэхийг нь мэдэхгүй байна. Харин тоглолт зохион байгуулах тайз хөгжим, гэрэлтүүлэг бэлтгэх үүрэгтэй. Миний сонссоноор тав зургаан дуучин хамтлагтай холбогдсон юм билээ. Одоогоор хоёр дуучныг урих ажил эцэслэгдээд явж байгаа гэсэн. Ямар мөнгөөр хэзээ авчрах вэ гэдэг нь тодорхойгүй байгаа. Гадны дуучин ирнэ. Гэхдээ Жениффер Лопес уу, Беонси, Back street boys гэдгийг эцэслээгүй байна. Зарим хүмүүс наймдугаар сард авчрах нь зөв гэсэн санал гаргасан” хэмээсэн. Тэгвэл Монгол Улсын Шадар сайд У.Хүрэлсүх Үндэсний баяр наадмын бэлтгэл ажилтай танилцах үеэрээ ямар ч гадны дуучин урихгүй тухай хэллээ. Тэрээр “Жилд ганц удаа болдог үндэсний баяр наадмыг сайхан тэмдэглэн өнгөрүүлэх нь бидэнд хэрэгтэй, эх орноо сурталчлах цаг үе шүү дээ. Монгол ахуйг харуулсан олон үйл ажиллагааг зохион байгуулна. Мөн аюулгүй байдлыг хангаж ажиллах ёстой. Энэ үүргийг цагдаагийн байгууллага амжилттай зохион байгуулсаар ирсэн. Үндэсний баяр наадмын үеэр гадаад дуучин, хөгжимчдийг оролцуулахгүй. Үндэсний баяр наадам бол зөвхөн өөрсдийн өв соёл, ёс уламжлалыг сурталчилж, түгээн дэлгэрүүлэх ёстой. Сэргээшийн асуудал дээр хатуу байр суурьтай байгаа. Хэрвээ бөхчүүд сэргээш хэрэглэсэн нь тогтоогдвол цолыг хурааж, барилдах эрхийг хасах хүртэлх арга хэмжээг авна. Энэ жилийн Үндэсний их баяр наадмаар гадаадын хамтлаг, дуучдыг өндөр өртөгтэйгээр урьж тоглуулах талаар багагүй мэдээлэл гарсан. Энэ асуудалд эцэслэж хариу өгөх хэрэгтэй. Тийм асуудал огтхон ч байхгүй. Бид монголынхоо шилдэг уран бүтээлдчийн тоглолтыг наадамчин олондоо толилуулахаар бэлтгэж байгаа гэдгийг албан ёсоор мэдэгдье” хэмээсэн юм.

Эх сурвалж: Шуурхай.мн