Малайзийн Холбооны Улсад монгол эмэгтэй халдлагад өртсөн тухай мэдээллийн дагуу Малайзын Куала Лампур хотын Петалинг дүүргийн Цагдаагийн газрын комиссорын туслах, мөрдөн байцаагч Азми Аву Кассим /Petaling Jaya district police chief Assistant Commissioner Azmi Abu Kassim/ -тай Тайланд дахь манай элчин сайдын яамныхан утсаар холбогдож дараах мэдээллийг авсан байна.

Мөрдөн байцаагч Азми энэ зургадугаар сарын 15-ны өдрийн 17:00 цагийн орчимд гарсан зэвсэгт халдлагад Монгол эмэгтэй өртсөнийг нотолж, хэргийг нягтлан шалгаж эхлээд байгааг дуулгажээ.

Гэмт этгээдүүд Малайзын иргэн, бизнесмэнийг онилон буудсан боловч хажууд нь сууж байсан монгол эмэгтэй суманд оногдож шархдсан байж болзошгүй гэдгийг мөрдөн байцаагч хэлжээ. Уг бизнесмэн өмнө нь халдлагад өртөж, бууны шарх авч байсныг дурдсан байна. Хэрэг явдал өс хонзонгийн сэдэлтэй байх магадлалтай гэжээ.

Малайзын Куала Лампур хотын Петалинг дүүрэгт бууны суманд өртсөн хохирогч монгол эмэгтэй нь суралцаж байсан эсэх нь тодорхойгүй. Ойр дотны холбоо барих хүний тухай мэдээлэл одоогоор байхгүй байгаа гэнэ.

Овог, нэр, паспортын дугаарыг үндэслэн Цагаачлалын албанаас холбогдох мэдээлэл авах, түүнийг Малайзид хэзээ ирсэн, юу хийдэг байсан зэргийг тодруулахаар ажиллаж байгаа юм байна.

Хохирогчтой хамт байсан Хятад гаралтай, Малайзын бизнесмэн мэдүүлэг өгөхдөө “Монгол эмэгтэйтэй танилцаад удаагүй байгаа. түүнийг Малайзад юу хийдэг, хэзээ ирсэн талаар мэдэхгүй” гэжээ.

Монгол эмэгтэй одоогоор ухаан ороогүй, эрчимт эмчилгээ хийлгэж байгаа юм байна.

Түүний биеийн байдлыг харзнан биенд нь байгаа хоёр ширхэг сумыг авч болох эсэх талаар эмч нар ярилцаж, шийдвэр гаргахаар болсон гэнэ. Мөрдөн шалгах ажиллагаа үргэлжилж байна гэж утсаар мэдээлжээ.

Эх сурвалж: Гадаад харилцааны яам