Хүүхэд багачуудын оюун ухааныг хөгжүүлэн төлөвшүүлж, олон оронтой тоог цээжээр төвөггүйхэн бодож чаддаг болгодог япон сампин соробангийн сургалт Монголд дэлгэрч эхлээд удаагүй байгаа билээ. Япон судлаач Д.Төмөрбаатарын тэргүүнээр нь ажилладаг Монголын соробангийн холбооны сурагчид соробангаар амжилттай суралцаж байгаа бөгөөд тус холбооны дэргэдэх “Монгол соробан” сургалтын төвийн сурагчид соробангийн эх орон Японд өнгөрсөн жилийн 7-р сард зохион байгуулагдсан “Олон улсын соробангийн цээж тооллын олимпиад Токио-2014”-т амжилттай оролцоод ирсэн билээ. Тэгвэл энэ 5-р сарын 6-нд Японы Цүкүба хотод болсон Ибараки мужийн соробангийн аварга шалгаруулах тэмцээнд “Монгол соробан” төвийн 4 сурагч оролцоод ирснээс 108-р цэцэрлэгийн 6 настай Т.Түвшинбаяр тус мужийн бага сургуулиудын 1-2 дугаар ангийн шилдэг хүүхдүүдтэй соробангаар тоо бодон өрсөлдөн түрүүлж, Ибараки мужийн аварга болжээ. Мөн “Монгол соробан” төвийн суралцаж буй 97-р сургуулийн сурагч Б.Баярбаясгалан, 24-р сургуулийн сурагч А.Жангар нар 4-р ангийн сурагчдын ангилалд оролцон, 2-р байрыг хуваан эзэлж, Монгол 14-р сургуулийн сурагч Д.Эгшиглэн тусгай шагнал хүртсэн байна.

Ибараки муж нь 3 сая хүн амтай бөгөөд дээрх тэмцээн болсон Цүкүба хот бол эрдэм шинжилгээний байгууллага, хүрээлэнгүүд төвлөрсөн, эрдэмтдийн хот гэж нэрлэгддэг хот юм. Ибараки мужийн аварга шалгаруулах соробангийн тэмцээн нь Улсын аварга шалгаруулах тэмцээний дараа орох том тэмцээн бөгөөд гадаад хүүхдүүд анх удаа оролцож байгаа нь энэ юм байна. Япон багш нар монгол хүүхдүүд богино хугацаанд ийм өндөр түвшинд хүрсэнд баяр хүргэн, Японд болдог олимпиад уралдаанд тогтмол оролцохыг зөвлөсөн байна. Түүнчлэн “монгол хүүхдүүдийг цаашдаа соробангаар тууштай хичээллэх юм бол япон хүүхдүүдтэй эн зэрэгцэх бүрэн чадвартай юм байна” гэж үнэлжээ.

Олимпиадад оролцсон “Монгол соробан” төвийн сурагч багш нар Токиогийн диснейланд, амьтны хүрээлэнг зэргийг сонирхон үзэж, олон япон хүн, хүүхдүүдтэй танилцаж нөхөрлөсөн байна. Мөн сүмогийн их аварга Хакүхогийн дэвжээнд очин, нутгийн ах аваргатай уулзаж тоо бодох чадвараа сонирхуулсан байна.

Монголын соробангийн холбооны тэргүүн Д.Төмөрбаатар: “Монголд соробангийн сургалтыг япон стандартаар явуулах бидний бодлого зөв явагдаж байгааг бид тэмцээний үр дүнгээс харж баярлаж байлаа. Энэ бол манай шавь нарын анхны том амжилт. Японы мэргэжилтэн багш нар “соробан бол том соёл, хүүхдийг төлөвшүүлдэг чанарыг нь орхигдуулж болохгүй шүү” гэж бидэнд захиж байсан. Монголын соробангийн холбоо нь Японы соробангийн сургуулиудын холбооны гишүүн байгууллага болсон бөгөөд бид цаашдаа Японд болдог том жижиг олимпиадад сурагч шавь нараа жилдээ 2-3 удаа тогтмол оролцуулах төлөвлөгөөтэй байна” хэмээн ярьж байлаа.