УИХ-ын гишүүн Н.Ганбямбатай Сонгуулийн хуулийн зарим асуудлаар ярилцлаа.
-Сонгуулийн хууль хугацаандаа батлагдах уу. Хоёр намын бүлгийн дарга нар Сонгуулийн хуулийг хугацаанд нь батална гэж яриад байна. Гэвч тодорхой ахиц дэвшил харагдахгүй зөвшилцөл нэрийн дор сунжрах төлөвтэй?
-Номхон тэмээг ноолоход амархан гэдэг үг бий. АН-ынхан даварсаар байгаад сүүлдээ зөвшилцөл гэдэг юм руу хөтөлж, Сонгуулийн хууль жонхуу л болж байна. Ерөөсөө л тэгье гээд зүтгэдэг айлын эрх хүүхэд байдаг шүү дээ. АН-ынхан яг л тэгж байна. Тэр бүхнийг нь за гээд болгоод л байдаг. Өөрсдийн дураар зүтгэж давруулсаар байгаад сүүлдээ гулсдаг, шилжинэ гэдэг нэрээр дахиж өөрсдийгөө сонгох боломжоор хангах гээд байна. Өөрөөр хэлбэл мажоритари тойрогт ялагдсан нэр дэвшигч гулсаад 28-ынхаа жагсаалтад ороод ирэх нь л дээ. Тэрийг нь хүлээж авахгүй гэхээр зөвшилцсөнгүй гээд баахан явлаа.
МАН асуудлыг шийдэхийн тулд бууж өгсөн. Гэхдээ зөвшилцөлдөө гулсахдаа хэмжээ хязгаартай байя. Ядаж 30-аас дээш хувийн санал авч байж шилжиж болох юм байна гэдэг зарчим яригдсан. Гэтэл цэцэрлэгтээ явахдаа баавгайтай чихэр өгөхгүй бол явахгүй гэж эрхэлдэг хүүхэд шиг байдал гаргаж байна. Түүн шиг 30 хувийн босго өндөрдөнө. 30 хувийг буулга гэж байна. Эцэстээ энэ хуулийн төсөл яаж явагдах юм бэ, бүү мэд.
-МАН ийм хүлцэнгүй байж болохгүй биз дээ. Нэг хэсэг танай намынхан Сонгуулийн хууль батлагдахгүй гацаад байх юм бол олонхын системээр асуудлыг шийдэх боломж бий гэж байсан. Тэр ер нь юу болсон бэ?
-Уг нь хуулийг олонхоороо батлаад явдаг зарчим ардчилсан нийгэмд байдаг. Манайд болохоор номхон бурхныг нохой долооно гэгчээр ингэнэ, тэгнэ гээд ардчиллын зарчим гэж яриад эхэлдэг. Бид ч за гэсээр байгаад сурчихлаа л даа. Одоо ингэсээр байгаад Сонгуулийн хууль юу болох юм бэ, бүү мэд. Сонгуулийн хуулийг сайжруулбал сайн л байсан юм. Одоо ч хүн ойлгоход хэцүүхэн л болж.
-Яагаад ойлгоход төвөгтэй болсон гэж. Харин ч пропорциональ хувилбар бага ч атугай орчихлоо. Энэ нь бас дэвшил биш гэж үү?
-Ерөнхий сайд асан С.Баяр “Таван төгөлдөршил” гэдэг илтгэл тавихдаа пропорциональ системээр сонгууль явуулъя гэсэн шүү дээ. С.Баяр даргыг тэр үед пропорционалиар сонгууль явуулъя гэхээр нөгөө намын дарга нь үгүй мажоритариар сонгууль явуулна гэж мэдэгдэл хийсэн. Тэгээд 2008 оны сонгууль мажоритари системээр явуулсан шүү дээ. Тухайн үед АН-ын дарга Ц.Элбэгдорж байсан. Ингээд мажоритариар сонгууль явуулаад бөөн хэл ам дагуулсан биз дээ. Одоо С.Баярын дэвшүүлсэн пропорциональ, Ц.Элбэгдорж Ерөнхийлөгчийн мажоритари хоёрыг нийлүүлээд холимог систем болгож байгаа юм биш үү. Тэгтэл АН-ын тас гэдэргээ саваад үгүй гээд зүтгээд байгааг ойлгохгүй байна.
-Хамтарсан Засгийн газрыг байгуулахад харилцан санал солилцож байж л Сонгуулийн хуулийг шинэчилье гээд ажлын хэсэг хүртэл гаргасан. Гэвч ажил нь явахгүй ажлын хэсэг хугацааг нь тулгачихаар янз бүрийн шалтаг тоочиж бие бие рүүгээ буруугаа чихээд л. Энэ нь ард түмэнд ойлгомжгүй санагдаж байна шүү дээ?
-Зургаадугаар сард хаалтаа хийх ёстой байсан чуулган нэг намын бүлэг нь завсарлага авна гээд хэмжээ хязгааргүй асуудал тавиад сунжирсныг санаж байгаа. Тэгэхээр УИХ-ын Дэгийн тухай хуулийг жаахан жудагтай болгохгүй бол олон ойлгомжгүй асуудал цаашдаа гарах л болно. Ирэх сонгуулиар наймуулаа орж ирсэн нэг нөхөр бүлэг байгуулаад чуулганы бүрэн эрхийн хугацаа эхлэнгүүт нь завсарлага аваад дөрвөн жил Их хурлыг хуралдуулахгүй байж болох заалт ч хүртэл байна. Ийм задгай заалт УИХ-ын дэгийн тухай хуульд байдаг. Тэгээд буулт хийгээд наадмын өмнөх өдөр, даага шүдлэн уралдаж байхад шахуу хаврын чуулганаа хааж, ёсолсон. Гэтэл өнөөдөр яг энэ байдал давтагдаж, гурван есийн хүйтэн эхлэх гэж байхад үргэлжлээд явж байх жишээтэй. Халуун зун зөвшилцөж чадалгүй ингээд яваад байгаагийн гол эзнийг ард түмэн сохор биш харж л байгаа. Бөхөөр бол хоёр бөх барилдаж байгаад нэг нь буулт хийгээд байгаа хэрэг шүү дээ.
-Яг ямар буулт гэж?
-Бөхөөр бол буулт гэдэг чинь барилдаж байгаад нэгийгээ унаад өг гэхээр ойччихдог. Тэгэхээр тас гэдэргээ савж унах хүртлээ найраа ч юм уу, зөвшилцөл гэдэг байдлаар буулт хийсээр байгаад өвлийн хүйтэн болтол явлаа. Одоо МАН, АН хоёр зөвшилцөл нэрийн дор барилдаад, зөвлөлдөөд байх хугацаа байхгүй боллоо шүү дээ.
-Үнэхээр АН-ынхан сонгуульд унасан нэр дэвшигчээ гулсуулж, нэрсийн жагсаалтаар оруулах сонирхол давамгайлж байсан юм бол УИХ-ын гишүүн Д.Лүндээжанцангийн хуулийн төслийг дэмжиж болох байсан юм биш үү?
-УИХ-ын гишүүн С.Бат-Үүл, Д.Лүндээжанцан, Ж.Сүхбаатар нар Монгол Улсыг нэг тойрог болгоод пропорциональ систем дотор олон хувилбарын нэг хүнийг нь дугуйлъя гэсэн боломжийн хуулийн төсөл байсан. Хамгийн гол нь Сонгуулийн хуулийг өөрчилнө гэсэндээ боогдоод ингэж гүрийгээд байна. Түүнээс дээрх хуулийн төсөл маш боломжийн байсан.
-Дэмжлэг яагаад аваагүй юм бол?
-Хамгийн сайн хувилбар болохоор АН-ынхан санал болгож чадахгүй. Хамгийн сайн хувилбарыг уг нь болгочихмоор байгаа юм. Хамгийн шударга хувилбар. Ард түмний эрэмбэлсэн дарааллаар янз янзын бүлэглэлүүдийн шахааны томилгоо ч хийгдэж чадахгүйд хүрэх ийм заалтууд дотор нь орчихсон. Тийм учраас дээрх сайн хувилбар дэмжигдэж чадаагүй.
-АН-ынхан ард түмний сонголтоос айсан гэж хэлэх гээд байна уу?
-Мэдэхгүй. Наад асуултаа тэднээс очоод асуу.
-АН-ынханд ч гэсэн ашигтай хувилбар юм биш үү?
-АН-ын тавьсан шаардлага өөрсдөдөө ашигтай байлгах хувилбарыг эрэлхийлж байна шүү дээ. Мэдээж барилдаж байгаа хоёр бөх би баруун хөлийг чинь авъя. Ар талаас чинь сайн барьж авъя. Нөгөө бөх нь за л гээд хөлөө бариулаад л байгаа юм. Хөлөө өгчихлөө. Бөхөөр бол ар талаасаа бариулчихлаа. Давах хамаг шансыг нь АН-д өгчихөөд байна. Тэгсэн мөртлөө л энэ хууль чинь гарч өгөхгүй байна. Ард түмэн эрх биш нэгийг эргэцүүлж байгаа л байх.
-Нэгэнт л ард түмэнд амласнаараа Сонгуулийн хуулиа өөрчилж таарах байх. Тиймээс АН-ын саналыг тас гүрийгээд зөвшөөрөхгүй байж болохгүй юм уу?
-Харин ч манай нам номхон хүлцэнгүй байгаа. Гэтэл энэ байдлыг маань ашиглаад одоо бүр гулсуулна гэж зүтгээд. Түүнийг нь хүлээн зөвшөөрөхөөр 30 хувийг нь босгыг өндөр байна. Намхан болгож өг гэж байгаа юм даа. Энэ ч арай дэндэнэ.
-30 хувийн босго гэдэг нь боломжийн санал шүү дээ?
-Тийм. 30 хувиас дээш санал авсан хүн гулсаж болно гэж байгаа. АН-ыхан болохоор 29 хувийн санал авчихаад гулсах гээд байна л даа.
-Магадгүй АН-д нэрсийн жагсаалтад багтаах лидер цөөхөн учраас танай санал хатуудаад байгаа юм биш үү?
-Тэрийг АН-ын өмнөөс төлөөлж хариулах нь зохимжгүй.
-Үүнээс гадна Cонгуулийн шинэ хуулиар мандатын тоог цөөлж байгаа. Жишээ нь Хэнтий аймаг нэг мандаттай болоход та гурвын дунд ч асуудал үүсэх байх даа?
-Ирэх сонгуулиар хэдэн ч мандаттай болсон гурав биш 30 хүн өрсөлдөнө. Хэнтийгээс сонгогдсон гурван гишүүний хооронд үл ойлголцох асуудал байхгүй. Нэг ч мандат байсан өрсөлдөөн явагддаг зарчмаараа л явна.
-Өрсөлдөөн явагддаг зарчмаараа явна гэж байгаа ч танай намын бүлгийн дарга хүртэл намын гишүүдийн дунд мандатын тоог цөөлөхөд үл ойлголцол гарна гэж хэлж байсан шүү дээ?
-Энэ бол аль ч намд тохиолддог зүйл. Одоогоор Сонгуулийн хууль батлагдаг. Цөөн хүн амтай сонгогч багатай хэдэн аймгийг нэг мандаттай болгох асуудлыг ярьж байна.
-Жишээ нь танай аймагт хоёр мандаттай болж, намын зүгээс таныг дэвшүүлэхгүй гэвэл бие даах уу?
-Нэр дэвшигчдийн дунд өрсөлдөөн зарчмаараа л явах болно. Харин ч чи сонин зүйл асуух юм. Хоёр мандат байтугай нэг мандат дээр хичнээн ч хүн өрсөлддөг л асуудал.
-Мандатын асуудлаас гадна намын зүгээс хийх сонголтыг өөрөөр гаргавал гэж асууж байна л даа?
-Тэр чинь намын дотооод асуудал учраас чи бид хоёрын ярилцлагаар шийдэгддэхгүй. Өрсөлддөг зарчмаараа л өрсөлдөнө. Тэнд асуудал алга. Ёстой No problem байна. Өөрөөр хэлбэл тойрог дээр өрсөлдөхөд хоёр, гурван мандатад чанарын ялгаа байхгүй. Нэг мандаттай байсан ч Хэнтий аймагт 50 хүн өрсөлдөнө. Тэр чухал биш. Хэн ялах нь чухал.
-Гэхдээ намаас дэмжлэг авахгүй бол та нэр дэвшиж чадахгүй. Тэгвэл бие даах уу?
-Өрсөлдөх зарчмаараа өрсөлдөнө. Бие даана ингэнэ тэгнэ гэж урьдчилж ярих сонирхол алга.
-Удирдах зөвлөл, Бага хурлаар орно гээд танай намын шат дамжлага урт. Намд ард түмний саналыг баараггүй авах нэр дэвшигч л чухал шүү дээ?
-Нам намын дүрмэнд янз янзын заалт байдаг. Тэр утгаараа өрсөлдөх зарчмаараа өрсөлдөх болно. Нэг их асуудал гарч, дэвшүүлсэнгүй, ингэчихлээ гэж гоншигнох шаардлага алга.
-Гэхдээ л унасан бөхөд шалтаг мундахгүй гэгчээр асуудал үүсэхийг үгүйсгэхгүй шүү дээ?
-Хэнтийн гурван гишүүнийг хооронд нь мөргөлдүүлэх гэж оролдох хэрэггүй. Тийм зүйл болох ч үгүй.
Өглөөний сонин
Холбоотой мэдээ
Comments are closed.