Дөрөвхөн настай бяцхан охин харгис хэрцгий төрсөн эцэг, хойд эхийнхээ гарт зодуулж харамсалтайгаар амиа алдсан аймшигт хэрэг өнгөрөгч хоёрдугаар сарын 21-ний өдөр гарсан. Ээж, аавынхаа хайранд өсч, эрхэлж нялхрах насандаа томчуудын “тэнэг″ үйлдлээс болж биендээ даамгүй хүнд нөхцөлд тарчилсаар энэ хорвоог орхисон нь олон нийтийг бухимдуулж буй.

Мөн төрсөн охиноо үхэлд хүрэгсэн Тулгатын Цогт нь хуулийн байгууллагад ажилладаг тухай бүх л хэвлэл мэдээллээр цацагдаад байгаа. Тэр дундаа шүүхийн шинжилгээний үндэсний төвд ажилладаг төдийгүй түүний ах нь прокурорын албан тушаал хашдаг нэгэн гэнэ. Тиймээс Т.Цогт ялаас мултрахын тулд юуг ч хийж мэдэх учир шүүх хурлыг олон нийтэд нээлттэй хийх нь зөв байх.

Мөн албан бус мэдээллээр Т.Цогтын өмгөөлөгч “Цогтын биеийн байдал муу байгаа болохоор эмчилгээнд хамруулах буюу батлан даалтанд гаргах хүсэлтэй байгаагаа мэдэгдсэн” гэнэ. Нялх үрээ “мишок” болгож зодож нүддэг эцэг нэр зүүсэн араатан батлан даалтанд гарах хүсэлтэй байгаа нь ичгүүргүй гэдэг нь харагдаж байна.

Одоогоор тэдний холбогдох хэргийн мөрдөн байцаалт дуусч, яллах дүгнэлт үйлдүүлэхээр прокурорын байгууллагад шилжүүлсэн байна. Хэдийгээр тэдэнд холбогдох хэрэг прокурорын байгууллагад шилжсэн ч сэжигтэн Т.Цогт нь хэргээ хамтран амьдрагч Г.Маралмаад тохсон байж болзошгүй гэсэн албан бус мэдээлэл байна. Тодруулбал, сэжигтэн Т.Цогтод Эрүүгийн хуулийн тусгай ангийн 107.3, 246.1-т зааснаар хэрэг үүсгэн прокурорт яллах дүгнэлт үйлдэн шилжүүлжээ. Энэхүү заалтад бусдын амь бие нь аюултай нөхцөлд байхад нь тусламж үзүүлэхгүй байх, энэ хэргийн улмаас хохирогч нас барсан, бусад хүнд хор уршиг учирсан бол гурваас таван жил хүртэл хугацаагаар хорих ял шийтгэх, гэмт хэргийг мэдсээр байж зохих байгууллага, албан тушаалтанд мэдээлээгүй бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ хэмээн заасан байдаг аж. Тэгэхээр Т.Цогт хэргийг нуун дарагдуулсан гэж буруутгагдаж 3-5 жилийн хорих ял авах магадлалтай юм. Харин охины хойд эх болох хамтран амьдрагч Эрүүгийн хуулийн тусгай ангийн 91.2.12, 91.2.15-т зааснаар хохирогчийг биеэ хамгаалж чадахгүй байгааг мэдсээр байж, онц хэрцгий аргаар хөнөөсөн бол 15-25 жил, эсвэл цаазын ялаар шийтгүүлнэ гэж заажээ. Тэгэхээр Г.Маралмаа охиныг хөнөөсөн зүйл ангиар буруутгагдаж байна гэсэн үг.

Төрсөн охиноо хамтран амьдрагчтайгаа нийлж амь насыг нь хөнөөчөөд хэргээс өөрөө мултарч гарч байгаа нь шударга бус санагдаж байна. Ард түмний нүдэнд ил тодоор харагдах энэ хэрэг шударга шүүхийн өмнө хүчин мөхөстөж сөхөрсөн ч төрсөн үрээ хөнөөсөн Т.Цогт нийгэмд чөлөөтэй алхана гэдэг нь аймшигтай.

Эх сурвалж: Шуурхай.мн