“Зүүдэнд ч оромгүй явдал” инээдмийн уран сайхны кинонд хамт тоглосон гэдгээ “мэдээгүй” явсан жүжигчин бүсгүйчүүд нөхрөө булаалдаж хэвлэлээр дамжуулан хэрэлдэж байсан удаатай. “Маск” продакшны жүжигчин Г.Золзаяа өөрийн нөхөр болох УДЭТ-ын жүжигчин Б.Тамираас салсан цагаасаа хойш шоучин нэр зүүж, элдэв янзын эрчүүдтэй нэр холбогдож явсан. Гэвч тэрбээр чухам ямар шалтгаанаар гэр бүлийн амьдралдаа цэг тавьсан тухайгаа ер ам нээгээгүй бөгөөд нэгэн ярилцлагадаа энэ бүхний бурууг жүжигчин Н.Мөнхсоёл гэх бүсгүйд тохсон нь уг хэрүүлийг эхлүүлсэн гэдэг.

“Сити” дээд сургуулийн жүжигчний ангийг 2013 онд төгссөн Н.Мөнхсоёл уран бүтээлээсээ илүүтэй амрагийн явдлаараа нэрд гарах шахсандаа ихэд бухимдаж байгаа нь үнэн. Нөхөр хүүхдээ орхиод айл гэр үймүүлсэн хэмээх яриаг тэрбээр үгүйсгэж, албан ёсоор тайлбар хийсэн бөгөөд экс найз залуу Б.Тамирынхаа хуучин эхнэрт ихэд гомдож байгаагаа ч илэрхийлжээ. “Хүн яагаад ийм муухай болчихдог байна аа. Өөрөө ямар ч гэм хийгээгүй хүн шиг нэр цэвэр үлдэхээр яасан их улайрна вэ” гэж харууссан жүжигчин бүсгүй анхны амьдрал нь бүтэлгүйтэж, бяцхан хүүтэйгээ хамт амьдарч байгаагаа олонд дэлгэсэн билээ.

Гэвч жүжигчин бүсгүйн хоёр дахь сонголт мөн л буруудаж, өдгөө Б.Тамираас дотно холбоогоо бүрмөсөн тасалсан ч гэлээ, экс эхнэрийнх нь элдэв хэл амны бай болсон хэвээр байгаа аж. Тиймээс өөрийн нэр төрийг хамгаалан хэрэндээ л “үзэлцэж” яваа төдийгүй жүжигчин Б.Тамиртай орооцолдсондоо ихэд харамсч суугаа гэнэ.

Шинэ хуучин бэрүүд нь ийн хэвлэлээр нэг “уралцаж” байхад Ардын жүжигчин С.Сарантуяа, Соёлын тэргүүний ажилтан О.Бат-Өлзий нар ч яаж зүгээр суухав. Жүжигчин Б.Тамирт хатуухан үг дайж, хувийн амьдралынхаа энэ мэт асуудлыг нэн даруй шийдэх үүрэг өгсөн гэнэ лээ.

Б.Содон

PHOTONEWS.MN