Ардчилсан төрийн гол зарчим бол ажилдаа хариуцлагагүй ажилласан хэн хүнтэй хариуцлага  тооцож болдогт оршдог. Гэтэл өнөө  үед  ажилдаа хариуцлаггүй хандсан, албан тушаалаа ашиглан бусдын эд хөрөнгийг луйвардсан, авлигын хэрэгт орооцолдсон  хүн танил тал, хууль шүүхийнхэнийг “аргалан” албан тушаалтайгаа үлдэж чадсан зарим хүмүүс байх. Тэдний нэг бол ХӨСҮТ-ийн дарга Д.Нямхүү гэгч юм. Тэрбээр бусдын банкны барьцаанд байгаа эд хөрөнгийг “банкнаас хямд үнээр чөлөөлөн зээлээ төлсөн даруйд буцаагаад өгнө” гэж хууран мэхлэж буцаагаад авая гэхэд зээл чөлөөлсөн үнийн дүнгээс хэт их мөнгө нэхэж уг мөнгийг өгч чадахгүй нэгний  орон сууц байрыг хууль, шүүхийн байгууллагын танил тал, найз нөхөдтэйгээ нийлэн өөрийн өмчийн байр болгон авсан тухай мэдээлэл хэвлэлээр нэлээд цацагдсан.  http://www.bolod.mn/News/82230.html

Д.Нямхүү гэгч энэ  эрхэм үе үеийн Эрүүл мэндийн сайд нарыг “бялдуучлан” албан тушаалтайгаа үлдэж хоцроод ХӨСҮТ-ийг  мөнгө олох арга хэрэгсэл болгоод  удаж байгаа нэгэн ажээ. Өдгөө ХӨСҮТ Д.Нямхүүгийн танил тал гэх эрүүгийн элементүүд,  хил даван хууль бус наймаа хийгчдийн “орогнодог” газар болсон тухай учир мэдэх хүмүүс ярих юм билээ.

Д.Нямхүү ХӨСҮТ-ийг хувьдаа мөнгө олох арга хэрэгсэл болгож байгаа тухай мэдээлэл бидэнд ирсэн юм.  Хамгийн сүүлд л гэхэд тэрээр Шинэ жилийн баярыг Засгийн газраас төрийн байгууллагуудыг тэмдэглэн өнгөрүүлэхийг хориглосоор байтал үүнийг зөрчин ХӨСҮТ-ийн шинэ жилийн баярыг  2014 оны 12 дугаар сарын 23-ны өдөр тэмдэглэсэн байна. Ингэхдээ тэрээр  ХӨСҮТ-ийн 700 гаруй ажилтан нэг бүрийн цалин дээр  95.000 /ерэн таван мянган/ төгрөг нэмж шилжүүлчихээд, дараа нь үүнийгээ ажилтнуудаасаа эргүүлэн хураан авч  шинэ жилийн арга хэмжээндээ зориулсан ажээ.

Гэтэл цаад байгууллагатайгаа нэг  ажилтны шинэ жилийн зардлыг 60.000 /жаран мянган/ төгрөгөөр тохирч хүн тус бүрээс  35.000, нийт 700 хүнээс  24.500.000 /хорин дөрвөн сая таван зуун мянган/  нийт төгрөгийн ашиг олж хувьдаа завшсан нь  ХӨСҮТ-ийн олон арван эмч ажилчдын  дургүйцлийг төрүүлсэн байна. Д.Нямхүү даргын энэ байдлыг баримттайгаар илчилсэн захидлыг ХӨСҮТ-ийн эмч ажилчид Эрүүл мэнд, спортын сайд Г.Шийлэгдамбад хаяглан илгээжээ. Энэхүү захидлын мөрөөр хэдийнэ АТГ ажиллаж эхлэсэн сураг сонсогдоно билээ.

Д.Нямхүү даргын “балаг” үүгээр дуусахгүй. Өнгөрсөн намар “ЭБОЛА” вирус ид дэгдэж байх үед эмч, мэргэжилтнүүдийг гадаадад сургахаар төрийн зардлаар явуулахад мань эр  “эсгий хийх газар нохой хэрэггүй” гэдэгчлэн эмч мэргэжилтнүүд дунд  ороод  төсвийн мөнгийг үрэн таран хийж аялаж зугаалаад ирсэн гэдэг.   Юугаа ч мэдэхгүй байж гадаадад зорих эмч нарын багт орж явсан  зорилго нь зөвхөн “мөнгө илүүчилж хувьдаа завших” гэсэн Д.Нямхүүгийн шуналтай зантай л холбоотой гэж ХӨСҮТ-ийн ажилчид өөр хоорондоо ярилцах юм билээ. Энэ тухай ХӨСҮТ-ийн эмч мэргэжилтнүүд Эрүүл мэндийн сайд Г.Шийлэгдамбад хаягласан дээрх захиандаа мөн дурьдсан ажээ.

Энэ өвөл амьсгалын гаралтай цочмог ханиад хүрсэн хүүхдүүдийн тоо огцом өссөнтэй холбоотойгоор эмнэлэгүүдийн хүртээмжийг нэмэх шаардлага тулгарсан. Тиймээс хүүхдийн эмнэлгүүдийг хүртээмжтэй болгох үүднээс 728 ор шинээр нэмэгдүүлэх шаардлага тулгарснаар төрөөс энэ асуудлыг шийдвэрлэхээр шат шатандаа анхааран ажиллан ССАЖЯ-ны байрыг 150 ортой хүүхдийн эмнэлэг болгохоор шийдвэрлэсэн ч эмнэлгийн үйлчилгээ үзүүлэх боломжгүй гэдэг асуудал тулгарсан. Харин Зам тээврийн яамны байрыг хүүхдийн эмнэлэг болгох шийдвэрийг Засгийн газраас шийдвэрлэхэд  Зам тээврийн сайд Н.Төмөрхүүгийн хувьд “Засгийн газраас нэгэнт эмнэлэг болгох шийдвэр гаргасан бол бид  дагах ёстой. Хүүхдийн эмнэлэг болгоно гэж байгааг дэмжиж байна” хэмээн хүүхдүүдийн эрүүл мэндийн төлөө яамны байраа суллаж өгөхөөр болоод байгаа. Үүний дараа ХӨСҮТ-ийн нөөцийн тасаг нь гэнэтийн халдвар дэгдэх үед шуурхай ажиллах зориулалттай 50 ортой эмнэлгийн тасгийг түр хугацаанд хүүхдийн эмнэлэг болгох асуудал яригдсан байдаг. ХӨСҮТ-ийн 50 ортой нөөцийн тасгийг тодорхой хугацаанд хүүхдийн эмнэлэг болгон ашиглах боломж бий эсэхийг тодруулахаар очсон УИХ-ын зарим гишүүдэд  Д.Нямхүү дарга  “Үгүй” гэсэн хариулт өгч, нэг талаас засаг төрийн бодлого шийдвэрийг илт эсэргүүцэж, нөгөө талаас  ханиад томууд нэрвэгдсэн хүүхдүүдээс эмнэлгийн өрөө тасалгаагаа “харамлаж” байгаа нь харамсалтай. 
Уг нь тангараг өргөсөн эмч хүн  өрөө тасагтаа багталцахгүйн эрхэнд шалан дээр хэвтэж байгаа хүүхдүүдийг түр хугацаанд эмнэлэгтээ байршуулан  эмчилгээ үзүүлэх үүрэгтэй баймаар байсан. Тэр тусмаа өнөөдөр хүүхдийн эмнэлэг нь хүрэлцэхгүй байхад ХӨСҮТ-ийн Д.Нямхүү даргад нөөцийн нэг тасгаа чөлөөлөөд өгөх сэтгэл баймаарсан.

Д.Нямхүүгийн луйвар үүгээр дуусахгүй. Халдварт  өвчин судлалын үндэсний төв хэмээх   халдвар хамгааллын онцгой дэглэмийг сахих ёстой энэ газрын эргэн тойронд байх газар аль хэдийнэ  зарагдаад, тэнд нь орон сууцны барилгууд сүндэрлэж,  зарим нь Д.Нямхүү гэгчийн мэдэлд орчихсон сурагтай.
Мөн Д.Нямхүүгийн анхаарал болгоомжгүй, хариуц­лагагүй үйлдлээс улбаалан тэрбум гаруй төгрөг салхинд хийсчээ. Уг нь ДЭМБ-аас томуугийн вакциныг тавдугаар сарын 30-ны өдрөөр дуусгавар болгон хэрэглэхгүй байх талаар албан тоот ирүүлсэн бөгөөд үүнийг ЭМЯ-ны Халдварт өвчин-тархвар судлалын мэргэжлийн салбар зөвлөлийн тавдугаар сарын 19-ний өдрийн хурлаар хэлэлцэж, томуугийн вакциныг хэрэглэхгүй байх, нийт үлдэгдэл вакциныг хэрхэх талаар, хүчингүй болсон вакцины үнийг нөхөн төлүүлэх асуудлыг тавих талаар тус мэргэжлийн салбар зөвлөлөөс шийдвэр гаргасан байна. Тухайн үед вакциныг тоолоход хугацаа дууссан вакцин 342,000 хүн тун буюу үнийн дүнгээр ойролцоогоор нэг тэрбум 200 сая төгрөгийн вакцин ямар ч үр ашиггүй хаягдсан байна. Тэр ч байтугай томуугийн вакциныг устгахдаа Мэргэжлийн хяналтын ерөнхий газраас вакцин устгах тухай дүгнэлт авалгүй шууд Д.Нямхүү захирлын 2010 оны аравдугаар сарын 12-ны өдрийн А/78 тоот тушаалаар устгажээ. Мөн вакциныг хугацаа дуусахаас хэдхэн хоногийн өмнө аймаг орон нутагт 58.000 хүн тунг хүргүүлж байсан нь хөдөөгийн хүмүүст хугацаа дууссан вакцин хийх эрсдлийг үүсгэж, хүний амиар тоглох шахжээ. Энэ мэт ХӨСҮТ-ийн захирал Д.Нямхүүгийн ажилдаа хариуцлагагүй хандаж, олон тэрбум төгрөгийн үнэ бүхий вакциныг үрэн таран хийж, залилан луйварын  гэмт хэрэг үйлдсэнийг нь хууль хяналтынхан тогтоож, нэг тийш нь болгохгүй бол зөөлөн сэнтийдээ  үлдэхийн тулд тэрээр юу ч хийхээс буцахгүй нэгэн бололтой.

Төрийн байгууллагыг хувийн компани мэт үздэг, төсвийн хөрөнгө мөнгийг хувьдаа завших арга хэрэгсэл болгодог, эрх мэдлээ ашиглан  байгууллагын газраас бусдад зардаг, албан ташаалаа урвуулан залилан луйвар хийдэг, хариуцаж байгаа ажилдаа сэтгэлгүй ханддаг, эмч ажилтнуудтайгаа ойлголцож, тэднийг дэмжиж, удирдан ажиллаж  чаддаггүй, төрийн бодлого шийдвэрийг эсэргүүцдэг  ХӨСҮТ-ийн дарга Д.Нямхүү гэгчийг Г.Шийлэгдамба сайд  та нэн даруй албан тушаалаас нь чөлөөлөх  шаардлагатай.

Ийм “шийдчихсэн луйварчин”-ыг  Эрүүл мэнд, спортын сайд Г.Шийлэгдамба та үүрэгт ажлаас нь чөлөөлөхгүй юм бол  таныг иргэд олон нийт  ХӨСҮТ-ийн дарга Д.Нямхүүг бусармаг үйлдлээ үргэлжлүүлэн явуулахад нь  дэмжлэг үзүүлж байна гэж ойлгоход хүрнэ гэдгийг  эрхбиш за анхаарна бизээ

Ц.Мөнх