Онцгой  албан татварын тухай хуульд нэмэлт өөрчлөлт оруулах тухай хуулийн төсөл УИХ-ын зарим гишүүдийг ихээхэн бухимдуулж байна. Онцгой албан татвар нь архи,  тамхи,  автомашин, бензин гэх мэт цөөн хэдэг зүйл дээр л яригддаг. Гэтэл эдгээрт оногдох татварыг доллараар биш төгрөгт шилжүүлснээр тооцоолж хуулийн төслөө оруулж ирсэн нь маргааны гол сэдэв боллоо. Өнөөдөр ам.долларын ханш 1925 төгрөг болоод байгаа. Гэтэл уг төсөлд онцгой албан татварыг 1450 төгрөгөөр тооцжээ. Ийм нөхцөлд тухайлбал тамхин дээр аваад үзэхэд нэг ам.доллар тутамд 500 төгрөгийн хөнгөлөлт болж  энэ төрлийн бизнес эрхлэгдийн халаас руу орох юм байна. УИХ-ын гишүүн Л.Эрдэнэчимэг тамхины эсрэг хуулийг санаачлан  батлуулж  байсны хувьд иймэрхүү тооцоо  хийгээд бухимдаж суугаа аж. 2014 онд архи тамхинаас улсын төсөвт 312 тэрбум төгрөг төлвөрч байсан бол Онцгой албан татварын энэ төсөл тэр чигээрээ батлагдвал 250 тэрбум төгрөг болж орлого бууран, 61.5 тэрбумыг алдах юм байна. Үүнийг олж харсан Л.Эрдэнэчимэг гишүүн “Манайх Казахстаны тамхины мафийн сүлжээний эрхшээлд орчихоод байгаа. Тэднийг бид 61.5 тэрбумаар тэтгэх үү. Ийм лоббид өртөх үү. Сангийн сайдыг АТГ-т өгнө. УИХ-ын дарга нь энэ төсөл одоогийн Сангийн сайдын үед боловсруулсан төсөл биш, өмнөх сайдынх нь үед хийгдсэн төсөл гэж байна. Тэгвэл УИХ-ын дарга нь бас  ашгаас хуваалцах уу. Миний үзэж байгаагаар лав тамхины ашгаас зургаан  тэрбумыг нь Сангийн сайдад өгөх бол юу ч биш” гэж хардаж буй ажээ.

Б.Баяр

Эх сурвалж: Tumen.mn