Шударга өрсөлдөөн, хэрэглэгчийн төлөө газрын дарга О.Магнай дөнгөж сая ажлаа хүлээлгэн өглөө. О.Магнай 2012 онд шинэчлэлийн Засгийн газар гарч ирсний дараа ШӨХТГ-ын даргаа томилогдсон бөгөөд хоёр жил дөрвөн сарын хугацаанд ажилласны дараа ийнхүү ажлаа өгч байгаа юм. Харин ийм шийдвэр гаргах болсон тухайгаа нэгэн хэвлэлд өгсөн ярилцлагадаа хэлэхдээ “Миний хувьд өнөөдөр ажлаа өгөхөөр боллоо. Нэгдүгээрт, шинээр байгуулагдсан Засгийн газар ямар ч сөрөх хүчингүй. Ардчилалын үнэт зүйлсийн эсрэг үйлдэл хийж байгуулагдлаа. Бидний байгуулж байгаа нийгэм бол сөрөх хүчинтэй, сөрөх хүчин нь Засгаа хянадаг байх ёстой гэж үздэг. Зарим нам дэд сайдын албан тушаал оруулж ирнэ гэдэг нь хуйвалдаан дээд цэгтээ тулж байгаан илрэл. Энэ бол миний өөрийн итгэл үнэмшил зарчимтэй яавч нийлэхгүй зүйл. Хоёрдугаарт, манай агентлаг Өрсөлдөөний тухай хуулиар Ерөнхий сайдын бүрэн эрхийн хүрээнд байдаг. Энэ агентлагийн удирдлагыг зөвхөн ерөнхий сайд Засгийн газрын хуралдаанд оруулж томилж, чөлөөлж болдог. Тэгэхээр зарим хэвлэлүүд үүнийг шадар сайд мэддэг мэтээр ташаа ойлголт төрүүлэхээр мэдээлэл цацсан.

Гэвч тийм зүйл байхгүй. Яахав У.Хүрэлсүх гэдэг хүн шадар сайд болсон. Харин У.Хүрэлсүх гэдэг хүнтэй хамтарч ажиллах боломж миний хувьд байхгүй.  Бид нарын ёс суртахуун зарчим, үнэт зүйл таарахгүй. Эдгээр хоёр шалтгааны улмаас өнөөдөр ажлаа албан ёсоор хүлээлгэж өгч байна. Ер нь манай нийгэмд дүр эсгэсэн ардчилал, дарангуйллаас аюултай гэж нэг хүн хэлээд явсан. Тэр нь бодит утгаараа боллоо” хэмээсэн байна.

Эх сурвалж: Шуурхай.мн