Танил тал сайтай, мөнгөтэй эрхмүүдийн хүүхдүүд дахиад л Монгол Улсын Эрүүгийн хуулиар ял авалгүй мултарч, харин өмгөөлж, хамгаалах хүнгүй нь ял аваад явж одов. Өнгөрсөн гуравдугаар сарын 22-нд Сүхбаатар дүүргийн нутаг дэвсгэрт байрлах “DНL” компанийн вип өрөөнд 16 залуу мөрийтэй тоглоом буюу покер тоглож байгаад хуулийнханд газар дээрээ баригдсан билээ.

Тухайн үед бидний сайн мэдэх “Монгол-росцветмет”-иин захирал асан, УИХ-ын гишүүн асан Х.Бадамсүрэнгийн хүү Б.Бадрахтай хамт муу нэр, луу данстай “Мунзуй” хочит Г.Нямдорж болон эрх мэдэл бүхии олны танил эрхмүүдийн хүүхдүүд цагдаагийнханд үйлдэл дээрээ гардуулжээ.

Улайм цайм Эрүүгийн гэмт хэргийн үйлдэл дээрээ баригдсан хэрнээ “Мунзуй” Г.Нямдоржийг ганцааранг нь цагдан хорьж бусад этгээдүүдийг нь батлан даалтад гаргажг улмаар хэргийг нь хэрэгсэхгүй болгосон байна. Уг нь тухайн үед Г.Нямдорж 16-уулаа покер тоглосон гэдгийг тэр үйл явдлыг нүдээр үзсэн олон гэрч нотлодог.

Харин муу нэртэй, дээр нь хуулийнхныг хахуульдах мөнгөгүй Г.Нямдорж баячуудын хүүхдүүдийн хэргийг ганцаараа үүрч тухайн газраас баривчлагдаж байв. Түүнээс хойш таван сар хагасын дараа “ядуу, дээрээс нь муу нэртэй юм чинь чи л ял авах ёстой” гэсэн байдлаар өрнөсөн нэгэн хачирхалтай шүүх хурал Баянзүрх дүүргийн Эрүүгийн хэргийн нэгдүгээр шүүхэд өчигдөр боллоо.

Өөрөөр хэлбэл Х.Бадамсүрэнгийн хүү тэргүүтэй нөгөө алдарт мөрийтэй тоглоомчдыг шүүсэн хурлаас Г.Нямдорж ганцаараа ял сонссон гэсэн үг. Бүгдээрээ хамтран мөрийтэй тоглож, Монгол Улсын Эрүүгийн хууль зөрчсөн хэрнээ “Мунзуй” ганцаараа буруутан болж, нэг жилийн хорих ял ногдуулсан байна.

Хамгийн хачирхалтай нь түүний ял авах болсон шалтгааныг энгийнээр тайлбарлахад Г.Нямдорж өөрөө өөртэйгөө тоглосон мэт байдал үүсч, бусад этгээдүүд нь тэнд байгаагүй мэт замхран алга болсон байгаа юм. Уг нь хэрэг гардаг өдөр цагдаагийнхан мөрийтэй тоглогч нөхдүүдийг газар дээр нь барихдаа хэн, хэн хэрхэн тоглож байсныг баримт нотолгоотой нь бүртгэн авч, хэргийн материалд хавсаргасан л байж таарна.

Гэтэл мөрдөн байцаалтын явцад танил тал, мөнгөтэй эрхмүүд хүүхдүүддээ нэг, нэгээр нь сугалж авсаар байгаад энэхүү хэрэгт ганцхан Г.Нямдорж тунан үлдэж, нарсанд илгээгдэж байгаа нь Монгол Улсад шударга ёсны талаар ярих ямар ч боломжгүй болсны бас нэгэн бэлээхэн баримт мөн.

Тэдний тээврийн хэрэгсэлд нэгжлэг хийх үеэр жижиг сүх, хутга, мөрийтэй тоглоомын зориулалтын хясаа, цүнх сав, их хэмжээний мөнгө төдийгүй юу нь үл мэдэгдэх бодис байсныг ч цагдаагийнхан хураан авч, уг бодисыг шинжлүүлж байгаа талаар ч мэдээлж байсан билээ. Хэргийг мөрдөн шалгаж байх үед Б.Бадрах болон түүнтэй хамт явсан хүмүүст Эрүүгийн хуулийн 243 дугаар зүйлийн нэгд зааснаар Эрүүгийн хэрэг үүсгэн шалгаж байж.

Гэтэл Эрүүгийн хэрэгт буруутгагдаж байсан Б.Бадрах гэгч хэрэгт яагаад оролцоогүй болж, чухам ямар баримт, нотолгоонд үндэслэн хэргийг нь хэрэгсэхгүй болгов гэдэг нь хамгийн их анхаарал татсан асуудал юм. Монгол Улс мөрийтэй тоглоомын эсрэг хатуу хуультай.

Эрүүгийн хуулийн 243 дугаар зүйлийн нэгд “Хуулиар хориглосон мөрийтэй тоглоом /казино/ тоглосон, түүнийг зохион байгуулсан бол хөдөлмөрийн хөлсний доод хэмжээг 5-50 дахин нэмэгдүүлсэнтэй тэнцэх хэмжээний төгрөгөөр торгох, эсхүл 1-3 сар хүртэл хугацаагаар баривчлах ялаар шийтгэнэ” хэмээн заасан байна. Гэвч нууцаар мөрийтэй тоглоом зохион байгуулдаг газрууд олширч, Монголын баячууд энэ төрлийн хэрэгт байнга нэр холбогдох болоод байгаа.

УИХ-ын гишүүн асан Х.Бадамсүрэнгийн бага хүү Б.Бадралаас гадна түүний ах Б.Бүрэнжаргал өмнө нь Монголбанкны ерөнхийлөгч асан, О.Чулуунбатын хүүтэй хамт мансууруулах бодис тээвэрлэж байгаад цагдаа нарт шалгагдаж байсан удаатай.

Эцэст нь дурьдахад иргэн хүн мөрийтэй тогловол гэмт хэрэгтэн болдог. Харин УИХ-ын гишүүн болон хүүхдүүд нь мөрийтэй тоглоод баригдвал хуулийнханд хахууль өгч ял зэмгүй өнгөрдөг өнөөдрийн дампуурсан тогтолцоо хэзээ устах бол.

Түүнчлэн өнгөрсөн сард “Вояж” зочид буудалд мөрийтэй тоглож байгаад баригдсан нөлөө бүхий эрхмүүдийн хэрэг хэрхэн шийдэгдэх бол гэсэн хүлээлт ч олны дунд үүсээд байгаа. Ер нь ингэхэд шударга шүүхийн тухай ярих хэрэг байна уу, үгүй юу. Монголд хамгийн их цалин авдаг хэрнээ хуулийг уландаа гишгичсэн шүүгч нартай ч хатуухан тооцоо бодох цаг болжээ.

Р.Саруул

Эх сурвалж: