Улс төр, нийгмийн хүрээнд Н.Энхбаяр гэдэг хадны мангаа бий болоод удаж байна. Өнөөдөр төрийн  эрх барьж байгаа улстөрийн намынхан нийлж нэгдэж байгаад энэ хадны мангаатай тэмцэж байна. Мандан бадарч явах үедээ хурааж хуримтлуулсан, идсэн уусан, төрийн хөрөнгийг шамшигдуулсан гэх дуулиан дэгдэж илчлэгдсэн ч амнаасаа гал дүрэлзүүлэн дайрсаар л. Хоёр намын нөхөд нийлж хамжиж байгаад ил далд хөрөнгийг нь илрүүлж хууль хяналтынханд өгсөн.

Үүний дараа ойр  дотны хамсаатнуудыг нь эхнээс барьж хорьж  байцааж байна. Гэсэн ч тэр хадны мангаа бууж өгөхгүй, улстөрийн хүрээнийхнийг айлгаж сүрдүүлээд, нэр хүндийг нь унагаад болдоггүй. Иргэний хөдөлгөөн, парламентад суудалгүй нам, гомдогсдыг эгнээндээ нэгтгэн байн байн бослого үймээн дэгдээчих гээд болдоггүй.

Хадны мангаатай галаар тэмцэх гэхээр өнөөдөр өндөр дээд сэнтийдээ суугаа, тухайн  үед мөр зэрэгцэн журмын нөхөд гэгдэж явсан зарим хүмүүс чирэгдэх гээд хэцүүхэн байгаа. Энэ хадны мангаатай нэр холбогдсон хэн бүхэн орох байхаа олж ядан их л тэвдэх юм. Сайнаар  ч байсан мугаар ч байсан ялгаагүй. Хууль зүй, дотоод хэргийн сайд Ц.Нямдоржтой зууралдан хамтдаа унана гэж гүрийх. Энэ хоёр эрхэмийн зэрэгцсэн  зураг хэсэг хугацаанд хэвлэлийн хуудсыг чимэв. Тэр бүрт Ц.Нямдорж сайд дотор муухайрч доогтой мушийх.

МАН-ын Ерөнхий нарийн бичгийн дарга У.Хүрэлсүх хадны мангаагийн гарын шавь байсан тухай  мөн мэдээлэгдсэн. Энэ үед У.Хүрэлсүх “Н.Энхбаярыг дарга байхад би хамт ажиллаж байсан. Гэхдээ би хатуу шүүмжлэлийг харин ч өөдөөс нь харж байгаа хэлчихдэг байсан. Одоо энэ хүний бий болгосон бузар булай бүхнийг арилгах гэж их л зовж байна” хэмээж нэрээ цэвэрлээд авчихна тэр.  Хамгийн сүүлд О.Магнай нэр холбогдсон юм. Н.Энхбаяр болон иргэний нийгмийн байгууллагынхантай нийлж тэрээр байнга ярьдаг хувьсгалаа  хийхээр төлөвлөгөө боловсруулсан тухай мэдээлэл гарсан юм. Төрийн оройд байхад нь байнга өөлж, шүүмжилж байсан тэрээр яаж яваад Н.Энхбаяр гэх мангаатай нийлэв.

АН их л гомдоож байгаа юм байна даа гэсэн хардлага нийгэмд хуурай өвсөнд хаясан гал шиг дүрэлзэв. Гэтэл О.Магнай яаран сандран энэ бүгдийг үгүйсгэн ярьж байна. Хүнийг ядарч явахад нь дээрээс нь дахин дарамтлаад, адлаад байх шаардлага надад байхгүй. Би уулзаж санал солилцсон нь үнэн. Гэхдээ хамтраад төлөвлөгөө боловсруулаад байсан зүйл байхгүй. Ер нь тэр хүнтэй нээх их нэр холбогдоод баймааргүй байна хэмээжээ.

Энэ мэтчилэн хамтраад нийлээд дайраад, дараад байхад бууж өгдөггүй мангаа бий болжээ.  Ирэх жил УИХ-ын сонгууль болно. Сонгуулиас өмнө хадны мангааг дарах  амлалт, төлөвлөгөө эрх баригчдад бий. Гэхдээ хамтдаа уначихгүй  байх хамгаас чухал болоод байна.
Б.Тэнгис