Шинэ жил болох дөхөж урлагийнхан энэхүү баярт зориулан шинэхэн уран бүтээлүүдээ гаргаж буй. Тэдний нэг дуучин Ч.Цэлмүүн, Нэгэн зүгт хамтлагийн С.Заяа нарын хамтарсан уран бүтээл “Шинэ жил ирлээ” дуу гаргасан боловч хэл ам дагуулж МУСТА С.Сэрчмаагийн бухимдлыг төрүүлэв. Учир нь залуу дуучид түүний дуулсан “Шинэ жил ирлээ” дууг шинэчлэн дуулсан бөгөөд дуучин бүсгүй болон хөгжмийн зохиолч, яруу найрагч нараас зөвшөөрөл аваагүй аж. Тэрээр энэ талаар С.Сэрчмаа өөрийн цахим хуудаснаа мэдэгдэл гарган тэдний дунд багагүй маргаан үүсээд байгаа. Өөрсдийнхөө цахим хуудсаар дамжуулан дуучид хоорондоо маргалдаж ширүүн үгс шулуудацгааж буй. Нэгэн зүгт хамтлагийн С.Заяа уг дууны хөгжмийн зохиолч Д.Санжаагаас зөвшөөрөл авч дууг нь дуулсан хэмээж байсан. Гэвч дуучин С.Сэрчмаа бичлэг хийн зөвшөөрөл аваагүй талаар нотолсон. Харин энэ бүхний хариуд дуучин С.Заяа өөрийн цахим хуудастаа “Би дуучных нь хувьд Сэрчмаа эгчийг хүндэтгэж явдаг. Гэтэл одоо миний эсрэг ийм бичлэг хийж тавьж байгаа бол би дараах тайлбарыг хийхээр шийдлээ. САНЖАА ХӨГЖМИЙН ЗОХИОЛЧ БОЛ ДУУЧИН СЭРЧМААГИЙН ТӨРСӨН ЭГЧИЙН НӨХӨР. Эхнэрийнхээ дүүгийн төлөө аргагүй ийм бичлэг хийлгэсэн гэдэг нь хэнд ч тодорхой байна. Гэтэл надад САНЖАА хөгжмийн зохиолчийн дуулахыг зөвшөөрснийг гэрчлэх 2 хүн, нотлох баримт, ярьсан яриа бүгд байгаа. Энэ бүхнийг би энд биш, шийддэг газар нь өгч шийдүүлэх болно” хэмээв. Энэхүү дуучдын хооронд хэрүүл дуусахгүй өрнөсөөр л байх бололтой.

Эх сурвалж: Шуурхай.мн