Н.Алтанхуягийн Засгийн газарт Шадар сайдаар хоёр жил гаруй ажиллаж, одоо энэ суудалдаа түр үүрэг гүйцэтгэгч хийж буй Д.Тэрбишдагвыг тойрсон хэл ам хэрүүл шуугиан хэдий болтол үргэлжлэхийг бүү мэд. Түүний хашиж байгаа энэ албанд Онцгой байдлын ерөнхий газар хамаардаг. Иймээс мань хүн анх шадар сайд болмогцоо тийш нь баахан танил талын хүмүүс, хамаатнуудаа хүчээр илгээж, ОБЕГ хэмээх энэхүү тусгай алба нь түүний хувийн компани шиг болжээ. ОБЕГ-ыг толгойлж буй Т.Дуламдорж нь Д.Тэрбишдагвын туслахаар олон жил ажилласан нэгэн. Зарим шоогч хүмүүс нь түүнийг “Д.Тэрбишдагвын цүнхийг зөөж гүйсээр яваад том дарга болсон” гэх. Өөр нэг хэсэг нь “Цэргийн жагсаалд ч зогсож үзээгүй Т.Дуламдорж Зэвсэгт хүчнийхэнтэй хамт хүндэтгэлийн жагсаалд зогсож байгаад ухаан алдаж унахаа шахсан” хэмээн инээлдэх. Ер нь тэр ОБЕГ-т очсоноос хойш хөгөө дэлгэж гүйцсэн болов уу. ОБЕГ-ын Тамгын газрын дарга нь бас л Д.Тэрбишдагвын нутаг усны нөхөр. Түүнийг н.Алтангэрэл гэдэг. Зөвхөн Архангайн Эрдэнэмандал сумаас гэхэд 10 гаруй хүнийг Д.Тэрбишдагва ОБЕГ-таа шахжээ. Энэ мэтээр Д.Тэрбишдагва, Т.Дуламдорж нар ОБЕГ-т мэргэжлийн хүмүүсийг мэргэжлийн бус этгээдүүдээр солих их аяныг хоёр жил гаруй хугацаанд өрнүүлсэн гэж шүүмжлэгчид цөөнгүй болжээ. Т.Дуламдоржийнх нь эгч ОБЕГ-т ажиллаж байхдаа нэлээд хэмжээний өмч хөрөнгө үрэн таран хийсэн хэргээр шалгагдаж, одоо ч асуудал нь бүрэн шийдэгдээгүй байна. Д.Тэрбишдагвын төрсөн ах Пүрэвдаавуу гэгч тэтгэврийн өвгөн ОБЕГ-т зөвлөхийн үүрэгтэйгээр хоёр жил гаруй төсвийн мөнгө “цохив”. Хэн ч залхмаар хамаатнуудын гайтай энэхүү сүлжээ хэзээ зад үсэрч тус газарт жинхэнэ мэргэжлийн хүмүүс очиж ажиллахыг тааж хэлэх мэргэн “шовгор” одоогоор алга бололтой.

Б.Отгонбаяр   

Эх сурвалж: Tumen.mn