“Фенобарбитал” буюу люминал эмийг тун хэтрүүлэн олгосноос 16 нярайг хордуулсан гэх “Монос” эмийн сангийн ажилтнуудад холбогдох хэргийг Дүүргийн эрүүгийн хэргийн анхан шатны II шүүхэд өчигдөр шүүж, эмч нарт ял оноожээ. Тодруулбал, “Монос эх нялхас” эмийн сангийн жор баригч Б.Эрдэнэчимэг энэ оны 8 дугаар сарын 8-9-нд “Фенобарбитал” эмийг эмчийн жороор нярай хүүхдүүдэд олгосон. Ингэхдээ том хүний тунгаар зарснаас болж 16 нярай хордож, ЭХЭМҮТ-д эмчлүүлсэн билээ.
Мөн “Монос-Улаанбаатар” компаний лавлахын эмч Д.Жавхлантөгс нь утсаар “Фенобарбитал” эмийг хэрэглэх зааврыг иргэдэд мөн буруу өгснөөс хоёр нярай хордох шалтгаан болсон гэдгийг прокуророос тогтоожээ.
Иймээс Б.Эрдэнэчимэг, Д.Жавхлантөгс нарт Эрүүгийн хуулийн 106.2-т заасны буюу үүргээ биелүүлээгүйгээс өвчтөнд хүнд хүндэвтэр гэмтэл учруулсан гэх эрүүгийн хэрэг үүсгэж шүүгдэгчээр татсан юм.