Хар тамхи хэрэглэсэн хэрэгт буруутгагдан хоригдож буй Г.Сарангэрэлийн гомдлыг өчигдөр Улсын дээд шүүхийн хяналтын шатны хуралдаанаар хэлэлцсэн. Шүүхээс түүнд үүссэн эрүүгийн хэргийн зүйл ангийг хэвээр үлдээж ялыг нь хөнгөрүүлсэн юм. Тодруулбал Г.Сарангэрэлийн гэмт хэргийн оролцоо бага, гэм буруугүйгээр хор уршиг учруулсан, бусдад уруу татагдсан гэх үндэслэлээр 1.6 жилийн ялыг нэг жил болгон хөнгөрүүлсэн байна. Энэ талаар түүний өмгөөлөгч Г.Батбаяр нэгэн хэвлэлд өгсөн ярилцлагандаа “Би үйлчлүүлэгчээ гэм буруугүй гэж үзэж байгаа. Хоёр шатны шүүхээс 1.6 жилийн ял сонссон байсан. Өнөөдөр / өчигдөр/ Дээд шүүх хяналтын шатны хуралдаанаараа хэргийг хэлэлцлээ. Шүүүхээс Г.Сарангэрэлийн нийгэмд учруулсан гэм хор бага юм гэсэн үндэслэлээр 1,6 жилийн ялыг нэг жилийн хорих ял болгож хөнгөвчиллөө. Улсын Дээд шүүхийн тогтоол гарсны дараа Эрүүгийн байцаан шийтгэх хуулийн 334.1-д заасны дагуу хугацаанаас нь өмнө суллуулах хүсэлтээ холбогдох газарт гаргах болно. Г.Сарангэрэлийн холбогдсон гэмт хэрэг нь хүндэвтэр бөгөөд Эрүүгийн хуулийн 74.3.1-д “Хүндэвтэр гэмт хэрэгт оногдуулсан хорих ялын хоёрны нэгээс доошгүй хувийг эдэлсэн бол хугацаанаас нь өмнө суллана” гэж заасан байгаа. Г.Сарангэрэл есөн сар хоригдсон. Дунд нь батлан даалтаар 14 хоног гарсан шүү дээ. Хоригдох ялын хоёрны нэгийг биечлэн эдэлсэн. Тиймээс шинэ оноос өмнө суллагдана” хэмээжээ.

Эх сурвалж: Шуурхай.мн