Булган овогтой Билгүүдэй хэмээх хоёр настай хүү 2014 оны 10-р сарын сүүлээр  цахилгааны улмаас үүссэн осолд өртөн шатны улайссан төмрөнд хоёр хөл, гар, хэвлий, нуруу бөгсөн хэсэг болон бусад хэсэгтээ түлэгдэж гэмтсэн.  Тэрбээр  түлэгдэлтийн 4-р зэрэгтэй, шагайн бүдүүн яс болон өргөн шөрмөс түлэгдэн ил гарч тасарсан, ходоодны шарх үүссэн байна.

Анхан шатны тусламжийг Монголд хийлгэсэн бөгөөд зүүн хөлийг өвдөгний доогуур тайрахаас аргагүй, мөн хурдан хугацаанд эмчилгээ хийлгэхгүй бол цусанд нь халдвар орон амь насанд нь аюултай гэж үзсэн.  Гэвч Бээжин хотын нэг эмнэлэгээс нааштай хариу өгсөн бөгөөд хүүгийн эцэг эх яаралтай эмчилгээнд ороод байгаа юм.

Хэдийгээр хүүхдийн  амь нас аюулгүй болж, хөлийг нь тайрахгүй ч гэсэн арьс болон махыг нөхөх эмчилгээ хийж, мөн хоёр удаагийн  мэс засалд орохоор болсон.  Энэхүү хагалгаанд ороход 60 сая төгрөг  шаардлагатай байгаа юм. Тиймээс бяцхан хүүд туслах зорилготой хандивийн тоглолт болох гэж байна. Их Монголын эзэнт гүрний байлдан дагууллын үед Монголчууд Ази тивээр таран одсон эмгэнэлтэй түүх бий. Энэ цагт Монгол угсаатнууд бусад улс орнуудын нутаг дэвсгэрт таслагдан оршин амьдарсаар байна. Үсэрсэн цус, тасарсан мах болох тэд маань эх нутгаа санагалзан нулимас эгшүүлж хэдэн зууныг ардаа орхисон одоо цагт ч элэг нэгт бидэнд гар сунган тусалж байна.

Өвчиндөө шаналж буй бяцхан хүүд зориулсан “Амьддаа бие биеэ хайрлая” хандивийн тоглолт Өвөрмонголын  Хөх хот, Хөвөөт шар, Урдын дунд хошуу, Баруун үзэмчин, Бээжин,Хайлар, Авга, Ордос, Өрөмч хот, Алша зүүн хошуу, Өвөр Монгол залуучуудын урлагийн холбоо хамтарч тусламжийн гараа сунгаж байгаа нь бахархууштай. Тэд бүгд санаагаа нэгтгэж  урлагийнхан нь хандив өргөн тоглолт хийж уриалж буй юм. Энэ бүхэнд нь Монгол улсын анхаарч үздэггүй элингэр долингор болсон ерөнхийлөгчийн нэрийн өмнөөс, хэрүүллийн бузар туссан улс төрчдийн өмнөөс, ажлаа мэддэггүй мунгинаа Эрүүл мэндийн сайдын өмнөөс учраа олохгүй гайхсан эгэл түмэн Монголчуудын өмнөөс элэг нэгтнүүдээ талархаж байгаагаа илэрхийлмээр.

Бидний хавчин гадуурхдаг Өвөрмонголчууд маань бусдын эрхэнд байгаа ч сэтгэл зүрхээ зориулан Монголынхоо бяцхан хүүд тусалж байхад, эрх чөлөөтэй тусгаар тогтносон ч сэтгэлгээний шоронд орсон Монгол жудагаа гээсэн бидний байгаа царай…

Бусдын эрхшээлд орсон ч Өвөрмонголчууд бидний үсэрсэн цус, тасарсан мах…

Дөнгөж 2 нас хүрч байгаа Б. Билгүүдэй хүүгийн эмчилгээнд зориулсан хандивт одоогоор найман газарт тоглолтоо хийж хандив цуглуулсан байна. 8 газарт тоглохоос 3 газарын мэдээ нь 40.760 юан, Хөвөөт шар хошуунаас 16,080 юан,  Шинжаны Үрүмчээс 37250 юан тус тус цуглажээ. Харин дөнгөж сая Шилийн голын авга хошуу тоглолт дууссан байна 37900 юан цуглажээ.

Монголоо гэсэн чин хүсэл сэтгэлтэй элэг нэгт Өвөрмонголчууддаа бяцхан хүүд зориулан хандиваа өргөж байгаад нь талархаад баршгүй. Бүх Монголчууддаа баярлалаа.

Эх сурвалж: Шуурхай.мн