Монгол улсын гурав дахь ерөнхийлөгч асан Н.Энхбаяр  “Монгол тулгатны 100 эрхэм” нэвтрүүлэгт оролцсон нь олон нийтийн анхаарлыг нэлээдгүй татаж байсан. Түүний оролцсон энэхүү нэвтрүүлэг уржигдар оройноос эхэлж телевизүүдээр цацагдаж эхэлсэн билээ. Уг нэвтрүүлэгт экс ерөнхийлөгч олон сонирхолтой зүйлүүд ярьсан бөгөөд  УИХ-ын гишүүн Ц.Нямдоржийн талаар ч яриад авсан юм. Харин өөрийнх талаар ярьсанд Ц.Нямдорж гишүүн ихэд бухимдсан бололтой олон сар оролцохгүй хэмээн зугтаасан “Цензургүй яриа” нэвтрүүлэгт өчигдөр орой оролцсон юм. Тэрээр өдгөө Н.Энхбаяртай өстөн дайсан байгаа ч нэгэн үе түүний төлөө хормойгоо дэвсээд гуйж явсан тухайгаа ярилаа. Тэрээр “Ер нь 2009 оны сонгуульд Н.Энхбаяр өөрөөсөө болж унасан. Хоёр балай нэвтрүүлэг хийгээд ялагдсан. Нэг нь Ц.Элбэгдоржийг Хятадын тагнуул гэсэн. Нөгөөдөх нь солонгосчуудаас мөнгө авсан гэсэн. Тэгээд л унаа биз дээ. Манай намын удирдлагууд намайг дэмжээгүй гээд гомдоллоод байдаг. Тэгээгүй шүү дээ. Бүгд эрвийх дэрвийхээрээ санхүүжилт олж ажилласан. Би тэр нэвтрүүлгүүдийг телевизүүдээр гарахад нь эсэргүүцсэн. Миний үгэнд ороогүй. Мөн улс төрд унаж сурах хэрэгтэй. Унасан хүн эвтэйхэн амьдрах ёстой. Би жишээ нь таван талаасаа сүлбүүлээд УИХ-ын даргаасаа унаж байна. Манай нам Н.Энхбаярыг огт гадуурхаагүй. Тэр өөрөө л нам байгуулаад явсан. МАХН нэрээ солиогүй бол Н.Энхбаяр МАН гэж байгуулаад явах байсан. Би буруу харж уйлаад зөв харж инээгээд л Н.Энхбаярыг дэмждэг л байсан шүү. 2009 оны Ерөнхийлөгчийн сонгуульд би Н.Энхбаярын төлөө хормойгоо дэвсээд баруун гурван аймгаар гуйж явсан. Ер нь олон удаа түүний төлөө ажиллаж байсан” хэмээв.

Эх сурвалж: Шуурхай.мн