“Говь Повер” ХХК их хэмжээний мөнгийг “Эрдэнэс-Тавантолгой” ХК-иас нэхэмжилж, нэхэмжилсэн мөнгөө шүүхээр шийдүүлэх замаар гарган авсан гэх мэдээлэл цацагдах болсон. Тэгвэл “Эрдэнэс-Таван Толгой” ХК-ийн Хууль, эрх зүйн хэлтсийн дарга М.Энх-Амгалантай  “Эрдэнэс-Таван Толгой” ХК хууль зөрчөөгүй хэмээн хэвлэлд ярилцлага өгч буй. Ерөнхий сайд асан Н.Алтанхуягийн  хүргэн Г.Дэнзэн нь “Говь Повер” ХХК-иар дамжуулан “Эрдэнэс-Таван Толгой” ХК-иас 4.8 тэрбум төгрөг гаргуулж авсан гэсэн мэдээлэл бий. Тэрбээр энэ  асуудлыг гэмт хэргийн шинжтэй эсэхийг тогтоох үүднээс мөрдөн шалгах ажиллагаа явуулах эрх нь холбогдох хууль хяналтын байгууллагад байгаа гэжээ. Харин “Эрдэнэс-Таван Толгой” компани уг асуудлыг өөрийн хүсэлтээр эрх бүхий байгууллагаар шалгуулах хүсэлтэй байгаа хэмээн ярьсан байна. Ингэх нь стратегийн томоохон ордод үйл ажиллагаа явуулдаг “Эрдэнэс-Таван Толгой” компанийн өнөөгийн үйл ажиллагааг бодитоор дүгнэхэд тустай төдийгүй олон нийтэд компанийг тойрсон асуудлуудаар үнэн зөв мэдээллийг өгөхөд чухал ач холбогдолтой хэмээн тэрбээр тайлбарлажээ.

“Говь Повер” ХХК “Эрдэнэс-Таван Толгой” компаниас 7,4 тэрбум төгрөг нэхэмжилжээ!

2012 оны 12 сард “Эрдэнэс-ТаванТолгой” ХК нь Өмнөговь аймгийн Ханбогд сумын нутагт орших Цагаан хад дахь гаалийн хяналтын талбайд гаалийн хяналтын бүс, түүнтэй холбоотой ажил үйлчилгээ үзүүлэгчийг шалгаруулах тендер зарлажээ. Тендер шалгаруулалтад “Говь повер” ХХК шалгарч, гэрээ байгуулан ажиллаж эхэлсэн юм байна. Яг энэ үед нүүрсний үнэ гадаад зах зээлд ихээхэн буурчээ.  Иймээс “Эрдэнэс Таван толгой” компани Чалко компанид нийлүүлэх нүүрсний тээвэрлэлтийн өртгийг бууруулах, үйл ажиллагааны зардлыг хэмнэх үүднээс нүүрсний тээврийг Цагаан хадаар дамжуулахгүйгээр уурхайн аман дээр гаалийн бүрдүүлэлт хийн шууд Хятадын  Ганц мод боомт хүртэл тээвэрлэхээр Чалко компанитай тохирсон гэж байна. Ингэснээр тус компани экспортолж байгаа  нэг тонн нүүрс тутамд таван ам.долларыг хэмнэх бололцоотой болжээ.  Засгийн газрын 2013 оны 225 дугаар тогтоолоор “Эрдэнэс-Таван Толгой” компанийн уурхай дээр гүний гааль байгуулахаар шийдвэрлэж, холбогдох арга хэмжээ авахыг үүрэг болгосон гэнэ. Нэгэнт Чалко компанид нийлүүлэх нүүрсийг Цагаан хадаар дамжуулан нүүрс экспортлохгүй болсон тул “Говь Повер” ХХК-тай байгуулсан гэрээг цуцлах мэдэгдлээ тус компанид 2013 оны 6 сарын 14-ний өдөр хүргүүлсэн хэмээн Эрдэнэс-Таван Толгой” ХК-ийн Хууль, эрх зүйн хэлтсийн дарга М.Энх-Амгалан ярьсан байна. Энэ шийдвэрийг “Говь Повер” компани эс зөвшөөрч Чингэлтэй дүүргийн шүүхэд 2013 оны 7  сарын 4 -ий өдөр нэхэмжлэл гаргажээ.  Нийт 7.4 тэрбум төгрөгийг “Эрдэнэс-Таван Толгой” компаниас нэхэмжилсэн юм байна.

 “ Говь Повер” компанийн үнэлгээг “Эрдэнэс Таван Толгой” ХК-ийнхан  өндөр гэж үзсэн тул Иргэний хэрэг шүүхэд хянан шийдвэрлэх тухай хуулийн 47 дугаарт зүйлд заасны дагуу шинжээч томилж үнэлгээг хийлгэх хүсэлтээ шүүхэд гаргажээ. Нийслэлийн Чингэлтэй дүүргийн шүүхийн шүүгчийн 2013 оны наймдугаар сарын 26-ны өдрийн 4071 дугаар захирамжийн дагуу Шүүхийн шинжилгээний Үндэсний хүрээлэнгийн шинжээч үнэлгээ хийж 2013 оны есдүгээр сарын 18-ны өдрийн 176 тоот дүгнэлтээр 5.3 тэрбум төгрөгөөр тогтоосон гэнэ. Шүүхийн шинжилгээний үндэсний хүрээлэнгийн Эдийн засгийн шинжилгээний орон тооны бус мэргэжлийн комиссын дээрх үнэлгээг 2013 оны есдүгээр сарын 18-ны өдрийн хурлаараа хэлэлцэж баталгаажуулсан юм байна.

Ж.Булган

Эх сурвалж: www.hunnu.mn