Ардчилсан намын 3 том фракц 2 тал болон үзэлцсээр МОАХ, Шонхор фракцууд сөрөг хүчинтэй хүч хавсран Алтангадасын Ерөнхий сайдыг засгаас буулгаж авлаа. Дараагийн Ерөнхий сайд хэн бэ? Алтангадасаас Ч.Сайханбилэг, МОАХ-с Х.Баттулга, нам дахь залуучуудын төлөөлөл болох Нэг Ардчилалын Лу.Гантөмөр нарын нэр хүчтэй гарч ирж байна.  Мөн МҮДН-ий Р.Амаржаргалын нэр ч тоймчдын амнаас унасаар л байна. Шонхор фракцад УИХ-н дарга хуваарилагдсан тул Ерөнхий сайдын суудал тэдний хувьд пасс. Эдгээрийн аль нэг нь гарч Ерөнхий сайд боллоо гэхэд дараагийн амбиц, дараагийн хонзонгийн л суурь болж төрийг амар заяа үзүүлэхгүй. Л.Гантөмөр чадалтай залуу ч түүнийг намынх нь ахмад үе хүлээн зөвшөөрч даган дэмжих нь бас л асуудалтай байгаад байдаг.

1998 онд өнөөгийнхтэй төсөөтэй нөхцөл байдал бас үүсээд байлаа. МҮАН-с нэлээд олон улс төрч дараагийн Ерөнхий сайдад яригдаж байв. Да.Ганболд, С.Зориг, Гагарин хэмээх Г.Ганхуяг, Э.Бат-Үүл, Ц.Баярсайхан нарын нэр яригдаж байлаа. Эдгээрээс Ц.Баярсайхан өнөөдөр УИХ-д байна. Өнөөгийн Ерөнхийлөгчөөр тухайн үеийн МҮАН-н дарга хийж халаа авах Ерөнхий сайдад улс төрчдийг нэр дэвшүүлж байсан Ц.Элбэгдорж ажиллаж байна. Өөрөөр хэлбэл хориг саад тавьдаг Н.Багабанди хэмээх саад алга болж МҮАН-н экс дарга Ц.Элбэгдоржийн байр суурийг 16 жилийн дараа өөрөө л эсэргүүцдэггүй юм бол шууд дэмжихээр нөхцөл байдал Ц.Баярсайханы хувьд үүссэн байна.

Ц.Баярсайхан бол даруухан, амбицаа дарж чаддаг, нухацтай, хүлээлгэн өгсөн ажлыг чин сэтгэлээсээ хийдэг улс төрч болохыг бид өнгөрсөн онуудад хангалттай харсан. МҮДН фракцад амбицтай, хурц хүмүүс зөндөө ч Ц.Баярсайхан шиг эвийн цавууны хүчээр тарж бутарч, хоорондоо хэмлэлдэхгүй, нэгдмэл санаатай, хамтын шийдэлтэйгээр олон жил болж байна. Зөөлөн нь хатуугаа гэдэг шиг түүний зөөлөн ч зарчимч чанар фракц дотроо, нам дотроо, төр дотроо эв эеийг олоход үлэмж нөлөөтэй байсаар л байна. Ц.Баярсайханыг Монголын хөгжлийг хөдөлгөх үүц болоод байгаа Өмнөговь аймгийн уугуул гэдгээр нь ч хүмүүс андахгүй. Тэр нам дотроо журмын нөхөдтэйгөө байтугай сөрөг хүчинтэйгээ ам мурийж байхыг харсан хүн байдаггүй. Чухамхүү хагаралдан хуваагдаад, тарж бутрахдаа хүрээд байгаа Ардчилсан Нам, Монголын төрд яг одоо л хэрэгтэй байгаа хүн бол Ц.Баярсайхан. Гол нь түүнийг олж харж итгэж дэмжих нь л чухал. Ц.Баярсайхан бол ахмад үе, дунд үе, залуу үеийн аль алины таашаалд бүрэн нийцэх Ерөнхий сайд болж чадах хүн. Өмнөговь дахь их бүтээн босголтуудад төрсөн нутгаа хайрлах, улсын хөгжлөө урагшлуулах зөв балансыг сэтгэл зүрхнээсээ олж чадах хүн бол Ц.Баярсайхан.

Инженер-эдийн засгийн мэргэжилтэй Ц.Баярсайхан эдийн засгийн хямралт байдлыг даван туулахад чухал хэрэгтэй боловсон хүчин мөн билээ. Бид тулхтай, ажил хэрэгч байр суурьтай, олон улсын асуудлаар оноо алдахгүй чамбай энэ хүнийг Ерөнхий сайдаараа ажиллуулж чадвал төр дэх фракц, албан тушаалын дайн намжиж үүнийг дагаад эдийн засаг тогтворжих боломж байна. Энэ боломжийг ашиглаад үзвэл яасан юм бэ?

Эх сурвалж: Sodon.mn