Хулгайч нарын арга нь нарийсч эмнэлэгийн байгууллагаар оролдох болжээ. Үлэг хулгайч нар эмчийн дүрд хувиран цагаан халад өмсч Дүүргүүдийн эрүүл мэндийн төв, Халдварт өвчин судлалын үндэсний төв зэрэг эмнэлэгүүдээр хулгай хийдэг байсан байна. Энэхүү хэргийг өнгөрсөн долоо хоногт Нийслэлийн Цагдаагийн газрын гэмт хэрэгтэй тэмцэх хэлтсийнхэн илрүүлэн шалгаж байгаа юм.

Гэмт этгээдүүд хөл хөдөлгөөн ихтэй, олон эмчтэй эмнэлгүүдэд цагаан халад өмсч ордог байсан бөгөөд улмаар эмч нарыг өрөөнөөсөө гарах хооронд нь өрөөнд нь орж утас, хэтэвч зэргийг нь хулгайлдаг байжээ. Мөн өвчтөнүүдийн өрөөгөөр хэсч эзэнгүй тасгаас хулгайлж болох зүйлсийг нь хулгайлдаг байсан гэнэ. Үүгээр ч зогсохгүй өвчтөний биеийн байдлыг асууж, зөвөлгөө өгдөг байжээ. Тэд эмнэлэг, Эрүүл мэндийн төвүүдээс гадна ЭМШУИС-ийн оуютан мэт жүжиглэж тэдэнтэй хамт лекцэнд нь сууж хулгай хийдэг байсан байна.

Энэ хэрэгт нийт 12 хүн сэжиглэгдээд байгаа бөгөөд одоогоор Цагдан хорих 461-р ангид хориод байна. Сэжигтнүүд 20-25 насны залуус байсан бөгөөд эрхэлсэн тодорхой ажилгүй аж.

Эх сурвалж: Шуурхай.мн