“Монголоо санасан сэтгэл”, “Амьдрал хайраар гоёдог”, “Андын сэтгэл” дуугаараа олны танил болон гарч ирсэн Хөвсгөл нутгийн залуу дуучин Я.Гэрэлчулуун   багагүй хугацаанд чамлахааргүй амжилт гарган дуучны ур чадвараа олонд таниулаад байгаа билээ. Тэрээр Европын орнуудаар хөгжмийн зохиолч, УГЗ Т.СэрОдтой хамт аялан тоглолтоор яваад ирсэн бөгөөд эх орондоо ирсэн даруйдаа шинэ уран бүтээлээ гаргаж сонсогч олноо баярлуулаад байгаа.

Түүний шинэхэн уран бүтээл болох  “Амьдрал чамд хайртай” дууны клип нь нийгмийн үнэн байдлыг  харуулахаас гадна амьдралын үнэ цэнийг харуулсан үгтэй дуу бөгөөд үзэгчдийн таашаалд хэдийнэ нийцээд эхэлсэн байна.  Шинэ дууны хөгжмийг хөгжмийн зохиолч Аранза буюу Бат-Эрдэнэ зохиосон байна. Харин үгийг нь дуучин залуу маань өөрөө зохиосон юм. Тэрээр өөрийн бичсэн шүлгээр бусдад ухаарал, бодрол хайрлахыг хүсдэг түүний энэ удаагийн  бүтээл ч мөн л залуучуудад нэгийг бодогдуулахаар сайхан уран бүтээл болжээ.