Гүйцэтгэх засаглалын тэргүүн Н.Алтанхуяг суудлаа хамгаалахын тулд долоон сайдыг танхимаасаа гаргав. Тэр ч бүү хэл үзэл баримтлал, онол практик гээд аль ч талаараа сүүдэр нь ч нэгсэмгүй МАХН-тай гар барьж, эвийн гэрээнд гарын үсэг зурлаа. Яахав, өөрөө танхимаа бүрдүүлж өөрөө оруулж ирсэн хэдэн сайдуудаа ойлгуулсан байх. Андууд минь хоёр жил идэж уух боломж олгосон. Олон юм ярихгүй юм байгаа биз гээд явуулсан бололтой, цаадуул нь ч Ерөнхий сайдыг тал бүрээс нь дайрч байхад чимээгүй л сууна, нэг муу эрийн шийр зааж байгаа санаатай.

      Анхнаасаа энэ хэдэн сайдын нэр дурдагдаж байсан төдийгүй ССАЖ-ын сайд Ц.Оюунгэрэл Н.Алтанхуягийн танхимаас туугдах сайд нарын нэгдүгээрт эрэмбэ эдэлж байсан ч санамсаргүй шалтгаанаар үлдчихлээ. Албан ёсоор бол “шинэчлэлийн Засгийн газар Соёл, спорт, аялал жуулчлалын яамыг байгуулахдаа яамны бодлого, үйл ажиллагаагаар дамжуулан даяаршлын эрин зуун дахь Монгол Улсын соёл, спорт, аялал жуулчлалын салбарт бусдаас ялгарах онцлогийг хамгаалах, тодотгох нэмэгдүүлэх зорилго тавьсан билээ. Тиймээс Засгийн газрын бүтцэд өөрчлөлт оруулах тухай хууль өнгөрсөн долоо хоногт батлагдаж, шинэчлэлийн Засгийн газрын байгуулсан хэд хэдэн яамд чиг үүргийн хувьд төсөөтэй яамдуудад нэгдсэн ч Соёл, спорт, аялал жуучлалын яамыг хэвээр үлдээлээ. Түүнчлэн салбарын сайдыг ч халж, сэлгэсэнгүй. Үүнийг яам болон яамны удирдлагын өнгөрсөн хоёр жилийн хугацаанд хийсэн ажлуудын үр дүн хэмээн соёл, урлаг, спортын олон зүтгэлтэн, мэргэжилтэн, ажилтан, тамирчид хэлж байгаа ажээ” хэмээсэн байна лээ.

      Энэ бол Ц.Оюунгэрэл ба түүний нөхдийн явуулж буй мэдээлэл. Түүнээс бус хамгийн тэргүүнд Монгол Улсын соёл урлагийн нэрийг шалан дээр унагасан хүн бол салбарын сайд хэмээн хэлдэг. Ямар сайндаа л хэдэн хэлхээтэй ясыг “Монголын үндэсний их өв соёл” гээд зогсож байхав дээ. Уг нь ийм сайдыг туухаас өөр арга байгаагүй л дээ.

    Харин Засгийн газар тарах, бүтэцэд өөрчлөлт орох тухай яриа гарах ахуйд л мань сайд маань спортынхонг дагаад туучихсан. Спортын чиглэлд гайгүй анхаарал хандуулаад авсан. Яг энэ мөчтэй дөрөө харшуулаад Жүдо бөхийн дэлхийн аваргын тэмцээн болж, манай тамирчид амжилттай оролцон аварга ч төрүүлэв. Үүний зэрэгцээ хүндийн өргөлтийн дэлхийн аваргаас алт мөнгө, хүрэл медаль хүртлээ. Үүний шилийг дараад чөлөөт бөхийн дэлхийн аваргаас алт болон бусад медаль бас л хүртэв. Өсвөрийн шатарчид ч дэлхийн дэвжээнд шуугиан тарив. Энэ бүх амжилтыг Ц.Оюунгэрэлтэй холбон шуугив. Энэ хэрээр салбарын сайдын нэр хүнд ч Н.Алтанхуягийн танхимаас цойллоо. Аргагүй, салбарынх нь сайд спортын энэ амжилтнуудыг өөртэйгөө наалгаад бичүүлээд байв. Уг нь бол манай тамирчид зарим нэг тэмцээн уралдаанд бараг л хувийнхаа зардлаар явах шахаж байсан. Му унэртэй хувийн хэьшилийнхэн л спортынхны зардлыг залгуулж байсан нь ч баримтаар бий. Түүнээс бус Ц.Оюунгэрэлд огт хамаагүй зүйл л дээ.

     Гэсэн ч их гэгээн шуугиан дундуур салбарын сайд маань Азийн олимпийн баг тамирчидтай Солонгосыг зорилоо. Манай тамирчид ч ёстой л нэг Азийн цээжинд дуулиан тарьсан амжилтыг үзүүллээ. Өнөөх салбарын сайдын маань нэр ч бараг Монголоос хальж, Азийн хэмжээнд түгсэн гэхэд хэтийдэхгүй. Ийм их гэрэлт дуулиан дундуур ССАЖЯ-ыг татан буулгаж, сайдыг нь гудамжинд гаргахгүй л дээ. Ямар ч тэнэг Ерөнхий сайд ийм зүйл хийхгүй нь ойлгомжтой. Хэчнээн татан буулгах, сайдыг нь унагах нийгэм улстөрийн захиалга байсан ч Ерөнхий сайдад спортынхны амжилт шавар хаасан гэхэд болно.

      Яг үнэндээ Ц.Оюунгэрэлийн амийг спортынхны амжилт л аварсан шүү дээ. Тэгэхээр салбарын сайд маань өөрөө ч мэдэж байгаа учраас энэ салбарт ихээхэн анхаарал хандуулах байх. Тэгэхээр сайдыг суудалдаа үлдэхэд гойд үүрэг гүйцэтгээгүй урлаг, утга зохиолын салбар яах билээ.

С.Баяр