Ерөнхий сайд Н.Алтанхуяг Засгийн газрын шинэ бүтцийн талаар танилцуулснаар олон асуудлын зангилаа тайлагдаж эхэллээ. Гэхдээ энэ дөнгөж эхлэл гэж ойлгож болно. Өнөөдөр Ерөнхий сайд мэдээлэл хийхдээ зургаан яамыг нэгтгэж гурав болгосон хэмээсэн.  Ингэхдээ хэн ямар яамыг удирдах талаар ам нээгээгүй.  Үүнээс гадна бас нэг анхаарлын төвд байгаа асуудал бол Гадаад харилцааны сайд Л.Болд Шадар сайдын үүргийг давхар гүйцэтгэхээр болсон  явдал юм. Ерөнхий сайд энэ талаар товчхондоо “Гадаад харилцааны сайд гадны улс оронд очиход зиндаа дээгүүр байх ёстой гэдэг үүднээс Л.Болд сайдыг Шадар сайд болгож байна” гэсэн юм. Энэ бол өмнө нь таамаглаж байгаагүй гэнэтийн мэдээ байсан гэхэд болно. Тэгэхээр Л.Болд давхар Шадар сайдын албан тушаалыг хаших нь тодорхой болсон юм чинь Д.Тэрбишдагва Тэргүүн шадар сайдын суудалд залрах нь бас л тодорхой хэмээн ярих хүн байна. Гэтэл өөр эх сурвалжуудын хэлж байгаагаар Тэргүүн шадар сайдын албан тушаалд  Н.Батбаяр томилогдох гэж байгаа хэмээн сэм ярьцгааж байна.   Учир нь Ерөнхий сайдын өргөн мэдүүлсэн бүтцийн өөрчлөлтөөр Эдийн засгийн хөгжлийн яамыг Сангийн яамтай нэгтгэсэн.  Тиймээс Н.Батбаяр хоосон үлдэхгүйн тулд Тэргүүн шадар сайдын суудал руу шантааж хийн, зүтгэж байгаа гэнэ.  Юутай уг мэдээлэл тодорхой болоогүй байгаа ч хэсэгхэн хугацааны дараа хэн Тэргүүн шадар сайд болох вэ гэдэг ойлгомжтой болох биз ээ.

Д.Анар