МАН-ынхан дундаа нэр нөлөө бүхий томд тооцогддог С.Баяр сүүлийн үед гадаадад амьдарч, эх орондоо хаяахан морилох болсон. Гадаадад амьдарч байгаа хэдий ч МАН доторх гар хөлөө өөрийн зоргоор хөдөлгөж чаддаг гэх С.Баяр Ерөнхий сайдын суудлаас бууснаасаа хойш АНУ-д амьдарч байгаа. Тэгвэл экс ерөнхийсайд С.Баяр эх орондоо ирсэн байгаа бөгөөд “Балдорж шагнал” гардуулах ёслолын ажиллагааг нээж үг хэлээв. Тэрээр хэлсэн үгэндээ “Миний дотны анд, Монголын сэтгүүлзүйн нэрт зүтгэлтэн Ц.Балдорж агсны нэрэмжит сэтгүүл зүйн дээд шагнал гардуулах ёслолын ажиллагаа зургаа дахь удаагаа болж байна. Монголын сэтгүүл зүйн түүчээ тогоруу, чөлөөт сэтгүүл зүйн гэрэлт тугийг баригч, Монголын хэвлэл мэдээлэлд аливаа шинэ бүхний шанг анхлан татагч байсныг бид сайн мэднэ. Түүний гэгээн гэрэлт үйлс унтаршгүй мөнх юм, хүсэл эрмэлзлэл нь дуусашгүй үргэлжлэхийн нэг илрэл нь сэтгүүлзүйн шилдгийг шалгаруулдаг энэ ёслол юм. Одоогоос зургаан жилийн өмнө Балын маань сан байгуулах үйл ажиллагаа болсон юм. Балын маань гэгээн дурсгалыг мөнхжүүлэн, чөлөөт хэвлэлийн үзэл санааг тууштай хэрэгжүүлж, нийгэмд шударга ёс тогтоох дэмжлэг үзүүлэх үйл ажиллагаанд оролцож байснаа дурсан санахад маш таатай байна. Бидний тавьсан хүсэл зорилго өнөөдөр биелэлээ олж байна” хэмээв.

Эх сурвалж:Шуурхай.мн