Монголчуудыг поп хөгжимд уруу татсан дуучин Болд дөнгөж сая Монгол улсын Төрийн соёрхол хүртлээ. Бяцхан хийлчнээс дуучин болтлоо хорин хэдэн жил хөдөлмөрлөсний дүнд тэрээр ийнхүү урлагийн салбарын өндөр хэргэмд хүрч байна. Тэр гавъяат болох бүрэн эрхтэй, хийсэн юмтай, авъяастай залуу. Ямар сайндаа манай зохиолын дуучин залуу Төрийн соёрхол болоход иргэдээс интернэтэд “энэ залуу юу хийсэн юм бэ, тэрний оронд Болдод өгөхгүй дээ” гэсэн утга агуулга сэтгэгдлүүд маш олноор ирсэн байж билээ. Болд дуугаараа нас насныхныг бишрүүлэхээс гадна хөдөлмөрч чанар, биеэ авч яваа байдал, нийгэмд оруулж буй өөрийн гэсэн хувь нэмрээрээ залууст үлгэр болсон залуу билээ. Цэцэрлэгийн багачуудаас өвгөд хөгшдийг хүртэл байлдан дагуулж чадсан ганц хүн бол яах аргагүй Болд билээ. Тэрээр рок поп урсгалыг үндэсний урлагтай хослуулан, морин хуурын гайхамшгийг мэдрүүлж байгаа юм. Анх удаа төрийн ордонд поп концерт тавьж бүх үеийнхнийг гайхшруулахын сацуу төрийн өндөрлөгүүдийн оюуны алжаалыг тайлаад амжсан. Гуравхан хоногийн өмнө гэхэд, гурван өдрийн туршид бие даасан тоглолтоо зохион байгуулахдаа Монголдоо хамгийн олон суудалтай Улаанбаатар паласын танхимыг битүү дүүргэсэн нь түүний олон талын чадварыг баталсан томоохон үйл явдал боллоо. Ингээд дуучин Болддоо уран бүтээлийн улам их амжилт хүсч Монголын үндсэний урлаг, хөгжмийг рок поптой хослуулан дэлхийд гаргана гэсэн чин зорилгодоо хүрэхийг хүсэн ерөөе.