Монголчууд бид мартамхай хүмүүс  юм даа. 2 жилийн өмнө 9 сарын 17-ны өдөр Тэнгис кинотеатрын  хажуугаар  ангийнхантайгаа хөгжилдөж явсан ШУТИС-ийн оюутан Ч-ийн дээрээс барилгын төмөр унаж амь насыг нь хохироосон. Энэ хэргийн улмаас Тэнгис кинотеатрын зүүн урд баригдаж байгаа барилгын ажлыг зогсоож, улмаар усан оргилуур барихаар зөвшөөрөл авсан ч зураг төслөө өөрчилж, олон давхар барилга барьж байгаа тухай холбогдох газрууд нь мэдээлж тухайн үед уг барилгыг буулгах ажлыг хэрэгжүүлнэ хэмээн мэдэгдэж байсан.

Хотын дарга Э.Бат-Үүл энэ мэтийн хүний амь нас хохироосон  зөвшөөрөлүй баригдсан олон барилгыг буулгуулах хүртэл хатуухан  арга хэмжээ авна гэдгээ олон нийтэд мэдээлэл хүргэсэн. Тэгвэл эдгээр барилгуудын хэдийг нь  өдгөө буулгасан вэ?

Тэнгис кинотеатрын өмнөх барилгыг буулгах, барих эсэх асуудал нь хэрхэн шийдэгдсэн нь ч одоог болтол тодорхойгүй хэвээр  байна.  Ямартай ч энэ хэрэгт Прокуророос өнгөрсөн оны  дөрөвдүгээр сарын 22-нд яллах дүгнэлт гарган  шүүхэд шилжүүлсэн байна. Шүүх хурлаар Эрүүгийн хуулийн тусгай ангийн 181 дүгээр зүйлийн 183.1 дэх хэсэгт зааснаар тус барилгын удирдлага болох Т.Батбилэг, И Сан Чол нарын тодорхой албан тушаал эрхэлж, үйл ажиллагаа явуулах эрхийг хасахгүйгээр 9 сая 828 мянга 900 төгрөгөөр торгох, Ц.Цогтгэрэлд хоёр жил хорих ял оноожээ. Энд та бүхэн анхаарч харсан биз. Албан тушаалтнуудын үйл ажиллагаа явуулах эрхийг нь хасаагүйгэрэ 9.8 сая төгрөгөөр торгоод асуудлыг хаасан бололтой юм.

Харин  өнөөдөр Тэнгисийн өмнөх барилга шөнө дөлөөр ажиллаж байна. Хотын даргын сүржин шийдвэр тухайн үедээ л хүчтэй байсан бололтой.

Ц.Мөнх