“Иргэдийн альяанс” төвийн тэргүүн Ж.Занаа гэхээр мэдэхгүй хүн байхгүй биз ээ. Цаанаа нэг намбатай, донж төрхтэй энэ эмэгтэй хүчирхийллийн эсрэг үйл ажиллагааг дэмжиж, бас ч гэж улстөрчидтэй ана мана үзэлцдэг нэгэн. Мөн тэрбээр өөрийн цахим хуудсаа идэвхтэй хөтөлдөг хэрэглэгч төдийгүй байнга шинэ шинэ зураг оруулж, заримдаа шүүмжилсэн нь ч бий.  Саяхан тэрбээр өөрийн цахим хуудаснаа Засгийн газрыг ширүүхэн шүүмжлээд авлаа. Тэрээр “Ийм хариуцлагагүй Ерөнхий сайд, ийм хэнэггүй хүн Засгийн газрыг тэргүүлж байна гэхээр ичгэвтэр. Юм болгонд ардчилал гээд л хашгирдаг, ардчилал гэж хашгирдаг амаараа авлига гуйж авахаас өөр чадах юм алга. Дээр нь худал ярьж чадаж байна. Энэ мэтийн бүтэлгүй нөхдөөс болж улс орон хохирлоо. Замын салбарт л гэхэд дэд бүтцийн өөрчлөлтийг санаатай саатуулж байгаа нь улс орныг хорлон сүйтгэж байгаа ажил. Олон хүний ажлыг алдуулж, машиныг нь эвдэж, үргүй зардал гаргаж байна. Засгийн газрын тэргүүн хорлон сүйтгэх ажиллагааг дэмжиж байгаа нь юу гэсэн үг вэ. Энэ АН-ын бодлого уу, Засгийн газрын бодлого уу. Замын компаниуд дээрх Чингис бондын тайланг үзэхэд, тэр компаниуд бүгд мөнгөө авчихсан юм байна лээ. Тэгээд ажлаа хийхгүй байна, тэдэнд яагаад хариуцлага тооцохгүй байна вэ. Хариуцлага тооцож чадахгүй байгаагийн цаана юу байгаа юм бэ. АН-ынхан замын ажлыг хойшлуулж байгаа нь наанаа жижиг асуудал мэт боловч, цаанаа асар олон хүний амьдрал, цаг, боломжийг хулгайлж, хувийн өмчид нь халдаж байна. Олон хүн тэр замд осолд орж, амь насаа алдаж байна. Саяхан Сүхбаатар аймгийн чиглэлд том оврын автобус осолдож, арваад хүн нас барлаа. Нарийн яриагүй болохоос замын чанарын асуудлаас болсон. Гэтэл жолоочид хариуцлага тооцоод өнгөрсөн. Жолооч асар олон цаг чанаргүй замаар явж ядарч сульдаж байна. Түүнээс болж осол гарч, эрдэнэт хүний амь нас сүйдэж байна. Гэтэл энэ тухай ярихгүй атлаа эхнэр хүүхдээ дагуулаад наадамлаад явж таарахгүй”хэмээн ихэд бухимдаж суугаа сурагтай.

Эх сурвалж: Шуурхай.мн