Энэ жил 100 гаруй сум 80, 90 жилийн тэгш ойгоо тэмдэглэж байгаа. Тэдгээр ойнуудад УИХ-ын гишүүд хийгээд гишүүн болох хүсэлтэй дарга, түшмэлүүд давхиж очин морь, бөхийн байнаас эхлээд бэлэг сэлт, хандив амалж яваа нийтлэг дүр зураг ажиглагдаж байна. Энэ л жишгээр УИХ-ын гишүүн Н.Номтойбаяр Дорнод аймгийн Баян-Уул сумын 90 жилийн ойд очсон байна. Тус сумын ойд УИХ-ын гишүүн Р.Бурмаа,  Б.Бат-Эрдэнэ, Х.Болорчулуун нар мөн очсон байж. Н.Номтойбаяр гишүүн наадмын ид оргил үед сэтгэл нь хөөрсөн үү, итгэл олж дахин сонгогдохоо бодсон уу, нөгөө гурван гишүүнээсээ илүүрхэх гэж санасан уу, “Намайг Баян-Уулд 50 сая төгрөг хандивлаж байгааг зарлаад өгөөч” гэж хөтлөгчид болон сумын удирдлагуудаас гуйх шалахын завсарт шавдуулжээ.

Харин үүний хариуд сумын удирдлагууд “Та хавар хотод болсон хандивын тоглолт дээр 50 сая төгрөг амалсан. Түүнийгээ өгөөгүй. Одоо дахиад 50 саяыг нэмж амалж байгаа юм уу. Тэгэхээр нийлээд 100 саяыг амалж байгаа гэж зарлах уу, өмнө амласан 50 сая төгрөгийг чинь энд дахин зарлах юм уу. Тодорхой хэлэхгүй бол таны 50 саяудыг чинь биднийг аваад идчихлээ гэж иргэд хардана шүү дээ” хэмээн амыг нь тагласан байна. Ийнхүү Н.Номтойбаяр гишүүн амаа алгадуулаад, хүндэтгэлийн хүлээн авалт энэ тэрд нь ч очилгүй сумын наадмыг дундаас нь орхин Дорнод аймгийн зүг тоос манарган одсон гэнэ.

С.Сод