Улсаараа наадамлаж, эх орноороо бахархан, өв соёл, зан заншлаараа дэлхийд гайхуулах нь тусгаар тогтносон Монгол улсын маань дээдийн дээд бахархал мөнөөс мөн.

Эрхэм хүндэт ард иргэд ээ!

Монгол Ардын Намын гишүүд, дэмжигчид ээ!

Та бүхэндээ Их Монгол улс байгуулагдсаны 808, Ардын хувьсгалын 93 жилийн ойн баярын мэндийг Монгол Ардын Намын нэрийн өмнөөс болон хувиасаа өргөн дэвшүүлж, сайн сайхан бүхнийг хүсэн ерөөе.

Сайхан эх оронд минь нар хур тэгширч, түмэн олны магнай тэнийж, Монгол түмний уламжлалт их баяр цэнгэл, эрийн гурван наадам болж хүчит бөхчүүдийн бяр мэх тэгширч, хурдан ажнай хөлгүүдийн уяа сойлго эвлэж , хурц мэргэн харваачдын оноо хараа жигдрэн Монгол хүн бүр Монголоороо гоёж дэнж хотойтол наадаж байна.

“Хувьтай хүн улсын наадам үзнээ” гэдэг үг зүгээр ч нэг үг биш юм. Улсаараа наадамлаж, эх орноороо бахархан, өв соёл, зан заншлаараа дэлхийд гайхуулах нь тусгаар тогтносон Монгол улсын маань дээдийн дээд бахархал мөнөөс мөн.

Энэ өдрөөс 93 жилийн тэртээ улс орныхоо тусгаар тогтнол, үндэсний эрх чөлөөг сэргээн мандуулахын төлөө амь биеэ үл хайрлан, зүрх сэтгэлээ зориулан зүтгэж, эх орныхоо өмнө мартаж болшгүй баатарлаг гавьяа байгуулсан мянга мянган эх орончиддоо хүндэтгэл үзүүлэн “Ардын хувьсгалын ойн баярыг үндэсний их баяр наадам” болгон нэгэн Зууны туршид тэмдэглэж ирсэн. Энэ бол түүхэн шийдвэр юм. Эх орон, тусгаар тогтнол, газар нутаг, эрх чөлөөний үнэ цэнийг үеийн үед бүү мартаг гэж, эх орон ямар үнээр оршин тогтнож буйг сана гэж, эв нэгдэл улс хүчирхэгжихийн гол суурь нь гэдгийг ойлго гэж Монголчууд 93 жилийн турш “Ардын хувьсгал”-аараа овоглон наадамлаж байна.

Тиймээ. Ялсан, зүтгэсэн, боловсорсон, хөгжсөн, бүтээсэн 93 жилийн түүх бол Монголчуудын дахин сэргэлтийн түүх байлаа. Монгол Ардын Намын нэгдэн, зүтгэн, тэмцэн бий болгосон бүхэн зөвхөн Монголынхоо ард түмний язгуур эрх ашгийн төлөө байсан гэдгийг цаг хугацаа улам бүр нотлон харуулж байна.

Монгол Ардын нам эх орныхоо тусгаар тогтнол, хөгжил дэвшлийн төлөө сэтгэл нэгдэн зүтгэж байхад саад бэрхшээл нэг бус удаа тохиолдож байсан. Хавчсан, хянасан, тулгасан, түгшээсэн олон бэрхшээл тохиолдож байсан ч бид эх орон, язгуур эрх ашгаа зөв эрэмбэлэн төр улс, ноён нуруугаа үл алдан, бэрхшээлийг даван туулсаар ирсэн. Өнөөдөр ардчилал нэрээр төрт ёсоо үл хүндэтгэн, эх орныхоо язгуур эрх ашгийг хойш тавин хувийн болон бүлэг фракцын эрх мэдэлдээ хөтлөгдөн ард түмнээ талцал, бухимдалд автуулан буй үйлдлүүд нь Монголын ард түмэн, Монгол Ардын Намын даван туулах ёстой олон саад бэрхшээлийн ердөө нэг нь юм. Монголын маань заяа их, Ард түмний хийморь нь босоо.

Бид хийсэн, бүтээсэн, хийнэ бүтээнэ.

Бид төр нь иргэнээ, иргэн нь төрөө хүндэтгэх төгс харилцааг бий болгоно.

Бид өнөөдрөөс илүү маргаашийн төлөө, өнөд орших эх орныхоо төлөө тулх, туршлага, мэдлэг чадвар бүхнээ зориулна.

Бид Монгол орон минь хөгжин хүчирхэгжиж, Монгол хүн тайван жаргалтай, элбэг хангалуун амьдрах цагийг дөтлүүлнэ.

Бид тусгаар тогтнол, үндэсний эрх ашиг, ард түмний эв нэгдлийг үеийн үед үнэнчээр сахин хамгаална.

Энэ бол Монгол Ардын Намын ард түмнийхээ өмнө хүлээсэн үүрэг, хөгжил дэвшилд хүргэх хариуцлага юм.

Хүдэр чийрэг бөхчүүд маань хүчтэй, шандаст хурдан хүлгүүд нь түрүү магнай, цэц манлай харваачид маань мэргэн байж, дэлхийд ганцхан Монгол наадамдаа хотол түмнээрээ сайхан наадаарай.

Та бүхэнд эрүүл энх, аз жаргал, сайн сайхан бүхнийг хүсэн ерөөе!

Монгол Ардын Намын дарга Миеэгомбын ЭНХБОЛД