Хууль зүйн сайдын “нялх амраг” хэмээн нэрлэгдэх болсон 19-хэн настай жоохон охин Г.Сарангэрэлийг өнөөдөр танихгүй хүн ховор болжээ. Үнэн худал нь үл мэдэгдэх мэдээлэл дунд Г.Сарангэрэл охин юу хийхээ мэдэхгүй төөрч будилж яваа харагдах шиг. Хүүхэд насныха гэнэн занг гээгээгүй яваа энэ охиныг өнөөдөр Монгол улс даяараа үзэн ядаж янхан, хулгайч, хар тамхичин гэх мэтээр хараах болсон нь эмгэнэлтэй.

Хэдийгээр нийгэмд сөрөг мэдээллээр танигдсан ч Г.Сарангэрэлийг Монгол улсын иргэн хүн гэдгийг цөөхөн хэдэн монголчууд бид мартаж болохгүй. Найз нөхөдтэйгөө ид залуу насныхаа гэнэн томоогүй зангаасаа болж ийн гэмт хэрэгт сэжиглэгдэж, улс төрийн золиос болж байгаа нь харамсалтай. Гэхдээ дөнгөж 19-хэн насан дээрээ ийн нийгэмд гадуурхагдаж, элдвээр зүхэж байгаа түүний ирээдүйг бид баллаж болохгүй баймаар. Хүн залуу насандаа алдаж, онох зүйл байдаг нь амьдралын жам. Гэхдээ хүн алдаанаас суралцаж, алдаагаа дахин давтахгүй байхад л болох атал нийгэм тэр аяараа энэ охиныг харааж зүхвэл эргээд яаж босох билээ.

Өчигдөр хэвлэл мэдээлийн бай болоод байгаа Г.Сарангэрэл нарын анхан шатны шүүх хурал хаалттай болсон билээ. Тэднийг  хар тамхи хэрэглэсэн, хадгалсан, борлуулсан хэрэгт шүүгдэгчээр татсан юм.

Гэвч Шүүх бүрэлдэхүүн шүүх хурлыг хойшлуулж, Г.Сарангэрэл нарыг цагдан хорих шийдвэр гаргасан. Учир нь Г.Сарангэрэл нарыг шүүх бүрэлдэхүүнээс татгалзсан учир тэднийг хорьж шүүх хурлыг хойшлуулсан гэнэ. Энэхүү шийдвэрийг сонссон охид уйлж эсэргүүцэж байгаагаа илэрхийлж байсан юм.

Тэрээр Г.Сарангэрэл шүүх хурлын үеэр толгойгоо боосон биеийн байдал нь хүндэвтэр харагдаж байлаа. Гэтэл түүнийг өнгөрсөн амралтын өдрүүдэд гадуур явж байхад үл таних этгээдүүд “Энэ нөгөө Г.Сарангэрэл байна” гээд шууд барьж аваад зодсон гэж түүний өмгөөлөгчид ярьсан юм.

Биеийн байдал нь нэлээн тааруу гэх дүгнэлтийг эмч нар гаргасан, шүүх хурлын өдөр шүүх эмнэлгийн дүгнэлт гаргуулах байсан ч шүүгч нар таслан сэргийлэх арга хэмжээ авсан гэлээ. Г.Сарангэрэлийн бусдад зодуулсан гэх хэргийг БГД-ийн хоёрдугаар хэлтэст шалгаж байгаа. Хэдийгээр муу нэрээр олонд танигдсан ч хэсэг бүлэг этгээдүүдийн хэл амны бай болж, элдэвээр хэлүүлж буй тэр охины сэтгэлийг ойлгож болохгүй гэж үү. Ирээдүйд эх хүн, хүний гэргий болох энэ залуухан охин сэтгэлийн шархаа насаараа санаж явах нь мэдээж. Насан туршдаа бусдаас дальдчиж, олны хөлөөс хол явахад хүрнэ. Магадгүй энэ их доромжлол, гадуурхалыг үл тэвчиж амиа хорлоход хүрвэл яах вэ. Тиймээс та бид нэгнийгээ унаж бүдэрч явахад нь улам дээрээс нь дэвсэж хаях биш харин ч түшиж босгох хэрэгтэй болов уу.

Эх сурвалж: Шуурхай.мн