Өчигдөр УИХ-ын хаврын чуулган өндөрлөлөө.Энэ үеэр хэд хэдэн хууль, тогтоолын төсөл баталсны нэг нь  “Цагаан суваргын ордын төрийн эзэмшлийн хувь тогтоох тухай”  байв.

Уг нь  энэ асуудлыг   УИХ  хэлэлцэж, гишүүдийн дийлэнх нь “Цагаан суварга”-ын ордод төр хувь эзэмших шаардлагагүй гэж үзсэн байсан ч эдийн засгийн байнгын хорооны  эцсийн хэлэлцүүлгээр гэнэт дэмжигдэж, хаврын чуулганы сүүлийн асуудал болон батлагдсан юм.

Асуудлыг хэлэлцэх үеэр УИХ-ын гишүүн Г.Уянга :
” “МАК”-ын захирал н.Цог гэх хүнийг  “Шударга ёс” эвслийн бүлгийн хуралдаанд оруулж мэдээлэл сонссон. Ер нь бол  Цагаан суварга олуулаа хүртэх ёстой орд. Н.Номтойбаяраа, миний дүү ганцаараа идээд ч барахгүй, аавтайгаа хамт идээд ч барахгүй. Монголын ард түмэн бүгдээрээ хувааж хүртэх ёстой. Монголчуудын баячуудын дийлэнх нь уул уурхайгаас төрсөн. Энэ бол баталж болохгүй гэрээ. Монголын төрд бизнесмэнүүд шургалж өөрийнхөө эрх ашгийг яаж хамгаалдагийг  энэ тогтоолын төсөл харуулж байна” хэмээв.

“Цагаан суваргын ордын төрийн эзэмшлийн хувь тогтоох тухай” тогтоолын төсөл УИХ-аар батлагдсанаар Засгийн газар  Цагаан суваргын зэс-молибдений ордоос төр 34 хувийн хувьцаа эзэмшихийн тулд  350.6 сая ам.долларын хөрөнгийг “Чингис” бондны мөнгөнөөс Н.Нямтайширын компанид өгөхөөр болж байна.

Дорноговь аймгийн Мандах сумын нутагт оршдог Цагаан суваргын зэс-молибдений ордын Ашиглалтын тусгай зөвшөөрлийг “Монгол алт (МАК)” ХХК эзэмшдэг бөгөөд тус компани 2001-2008 онд өөрийн хөрөнгөөр нарийвчилсан хайгуулын ажил хийж гүйцэтгэн, 2009 оны долдугаар сарын 29-ний өдрийн Эрдэс баялгийн мэргэжлийн зөвлөлийн хуралдаанаар нөөцийн тайлангаа хэлэлцүүлэн 250,4 сая тонн хүдэр, 0,643 хувийн агуулга бүхий 1,6 сая тонн зэс, 0,026 хувийн агуулга бүхий 66167 тонн молибден, 0,044 г/тн агуулга бүхий 11,127 тонн алтыг улсын бүртгэлд бүртгүүлсэн байдаг ажээ.

Б.Гантулга

Эх сурвалж: www.sonin.mn