Даяаршил эрчимтэй явагдаж буй энэ цаг үед улс үндэстэнүүдийн уламжлал, түүх соёл устаж үгүй болох аюул байдаг нь нууц бишээ. Гэтэл үүний эсрэг Нэгэн цагт цацсан шагай мэт бутарсан Монгол туургатангууд цуглан нийлэх түүхэн цаг үе нь иржээ. Эцэг дээдсээс өвлөгдөн ирсэн ёс заншилаа унтраалгүй сэргээх үүднээс С.Жавхлан “Хамаг Монгол” төслийг санаачлан бүх Монгол туургатан ах дvvсээрээ явж тулганы гал бадраан бахдам үйл хэргийг бүтээж яваа юм. Тэрээр дэлхийгээр тархан суурьшсан Монголчуудын харилцаа холбоог сайжруулж, Хамаг Монголчууд бие биедээ ойртоход үнэтэй хувь нэмэрээ оруулж буй билээ. Хамаг Монгол төсөл нь амжилттай хэрэгжиж олны талархалыг хүлээгээд зогсохгүй Монгол үндэсний язгуур соёл урлаг, түүх, ёс заншилаа хойч үедээ өвлүүлэх, түгээн дэлгэрүүлэх үйл хэрэг үргэлжилсээр байна. Олон сайхан уран бүтээлээр “Хамаг Монгол” төслийхөн Монгол цустай элэг нэгтнүүдээ омогшуулсаар удаах уран бүтээлээ түмэн олондоо бэлэг болгон Зууны манлай дуу Ц.Намсрайжавын хөгжим Ж.Бадраагийн шүлэг “Халуун элгэн нутаг”-ыг дахин амилуулжээ.

“XIII зуунд Их Эзэн маань зэр зэвсэг,аян дайлаар Хамаг Монгол улсаа нэгтгэж байсан. Энэ цагт харин бид оюун ухаан, дуу хуур, соёл урлагаараа нэгдэж, нэг зорилгын төлөө зүтгэж яваа гэдгээ харууллаа. Мах цус нэгтэй ахан дүүс бид, дуу хуур, соёлоороо эвлэлдэн нэгдэх тайван сайхан цаг иржээ” хэмээн ярьж байсан тэдний шинэ уран бүтээл олны талархалыг ихээхэн хүлээгээд байгаа гэнэ. Ингээд дуучин Самандын Жавхлан, Халимаг улсын жангарч Шараан Бадамхаалга, Тува улсын гавьяат жүжигчин, дуучин, хөөмийч Монгуш Сайдаш, Буриадын дуучин Раднаагийн Чингис, Өвөрмонголын “Хөх хээр” хамтлагийн дуучин Машбатын Баясгалан нарын элэг нэгт ах дүүстээ зориулан дуулсан “Халуун элгэн нутаг″ дууг хүргэж байна. Дэлхийн Монгол туургатануудын зүгт Монголоос соёлын довтолгоо жинхэнэ утгаараа эхэлжээ. Mонголчууд аа

Эх сурвалж: Шуурхай.мн