НИТХ-ын нэр бүхий төлөөлөгчид нарийн бичгийн дарга Б.Энхболдынхоо хамтаар Бразил улс руу туршлага судлах нэрийдлээр улсын мөнгөөр  явах гэж буй тухай дуулиан цахим ертөнцөөр ид дэгдээд байгаа.
Хамгийн хачирхалтай нь уг аялал гэгч  Бразилд болох хөлбөмбөгийн ДАШТ-тай давхцаж буй нь  иргэдийн эгдүүцлийг  хүргэж буй юм. лс орны эдийн засаг хямарч иргэдийн амьжиргаа орлого хүндэрч улсын төсөв хэдэн зуун тэрбумаар тасарч байхад нийслэлийн иргэдийн итгэлийг олж сонгогдсон тэргүүлэгчид татвар төлөгчдийн мөнгөөр Бразил, Куба улсад хурлын туршлага судлах нэрийдлээр амарч зугаалах гэж байгаад хэн бүхэн дургүй байх нь мэдээж.

Харин энэ талаар УИХ-ын дарга З.Энхболд өөрийн твиттер хуудсандаа “Дарханы ИТХ Дубай руу зугаалсныг аудит шалгаад өөрсдөөр нь төлүүлэхээр болсон. Бразил явсан УБ ИТХ төлөөлөгчид ялгаагүй хувиасаа төлнө” гэж байр сууриа илэрхийлж байсан юм. Тэгвэл Нийслэлийн хурлын тэргүүлэгч Д.Авирмэд энэ талаар тайлбар хийж “НИТХ-ын гишүүд бодлого боловсруулахад оролцдог учраас бидний ажлын нэг хэсэг нь улс орнуудаар явж туршлага судлах байдаг. Саяхан л гэхэд Вьетнам яваад ирцгээсэн. Бразил, Куба улсаа туршлага судлах албан томилолт хөлбөмбөгийн ДАШТ-тэй цаг хугацааны хувьд давхцсан нь асуудал болох шиг боллоо доо. Зарим хүмүүс олон нийтийн сүлжээгээр явахгүй, мэдэхгүй гэж мэдэгджээ. Харин би явна, хөтөлбөрийнхөө дагуу ажлаа амжуулаад ирнэ. Гэхдээ хөлбөмбөгийн тэмцээн үзэхгүй” гэсэн байна.

Эх сурвалж:Шуурхай.мн