Өнгөрсөн амралтын өдөр Монголд банкны салбар үүсч хөгжсөний 90 жил, Аварга цолтой бөхөд хүндэтгэл үзүүлэх барилдаанд аварга С.Мөнхбат,  харцага Ц.Содномдорж нарын барилдаан нэлээн дуулиантай болсон. Учир нь үзүүр түрүүний барилдааны үеэр С.Мөнхбат түрүүлэхдээ харцага Ц.Содномдоржийг унагасныхаа дараа толгой руу нь цохиж, нэдэрсэн нь олны дургүйцлийг хүргэж шүүмжлэлд өртөөд авсан. Түүний энэхүү үйлдлийг “Аварга хүн ийм жудаггүй, онгироо байж болохгүй″ хэмээн олон түмэн шүүмжлээд авсан. Тэгвэл энэ талаар аварга С.Мөнхбат тайлбарлахдаа “Санаатайгаар толгой руу нь цохисон асуудал байхгүй ээ. Санаандгүй тийм зүйл болчихсон. Ц.Содномдорж харцага бид хоёрын дунд ямар нэгэн үл ойлголцол, муудалцсан юм байхгүй. Сайхан найзалж, нөхөрлөөд л явдаг. Спорт тэр тусмаа бөхийн барилдаан гэдэг мэхээ даацтай сайн хийхгүй бол болохгүй гэдгийг бөх сонирхогчид мэдэх байх. Мэхээ гүйцээж хийхгүй бол уналгүй босоод ирэх байх гээд залгаа мэх хийсэн. Тэр нь хүмүүст буруу сэтгэгдэл төрүүлчихсэн байна лээ. Түүнээс санаатайгаар тийм зүйл болоогүй гэдгийг хэлмээр байна. Өмнө нь нэг барилдаан дээр өрсөлдөгч бөхөө уначихлаа гэж бодоод үргэлжлүүлж мэх хийгээгүйгээс болж алдаа гаргаж байсан” хэмээлээ.

Эх сурвалж: Шуурхай.мн