Гар утас гангараа биш хэрэглээ гэж манайхан ойлгодог. Гэсэн ч үнэтэй чамин гар утсанд мөнгө төгрөг хайрлахгүй авахыг бүгд л хүсдэг. Тэгвэл дэлхийд хамгийн үнэтэй гар утсыг Vertu брэнд үйлдвэрлэж, дэлхий нийтэд түгээж байна. Чамин загвар, эрхэмсэг байдал, дээд зэрэглэлийн төгс илэрхийлэл болсон гар утасны Vertu брэнд анх 1998 онд үүсгэн байгуулагдаж, энгийн бус тансаг хэрэглээг эрхэмлэгчдэд зориулсан цоо шинэ төрлийн утсыг үйлдвэрлэн гаргаж ирсэн гэнэ. Тухайлбал онгоц пуужин зэргийн үйлдвэрлэлд ашигладаг бат бөх чанараараа юутай ч харьцуулшгүй титаныг цагаан алт, улаан алт, шар алт зэрэг үнэт металлтай хослуулан, дэлгэцийг үл зурагдах сафираар бүтээсэн нь дэлхий дахинд шуугиан тарьж чадсан. VERTU брэндийн энэ утаснууд  үе дамжин өвлөгдөх үнэ цэнэтэй өв хөрөнгө, хэрэглэгчдээ бүрэн илэрхийлж чадах нэрийн хуудас нь хэмээн рекламддаг. Тэгвэл дахин давтагдашгүй өвөрмөц загвар дизайнтай, алмаз, бадмаараг зэрэг төрөл бүрийн үнэт чулуугаар чимэглэсэн дэлхийн хамгийн тансаг дээд зэрэглэлийн гар утсыг хэрэглэгчид Монголд цөөнгүй байдаг аж.  Одоогоос хоёр жилийн өмнө Монголд VERTU брэндийн гар утсыг албан ёсоор борлуулж эхэлжээ. Монголд  77 сая төгрөгийн үнэтэй зарагдаж байгаа гар утаснаас  топ модель Д.Болормаа, МУГЖ Т.Баясгалан нар худалдан авчээ. Харин эрчүүдээс УИХ-ын гишүүн Б.Наранхүү, Н.Номтойбаяр, УИХ-ын гишүүн асан Л.Сайхансамбуу тэргүүтэй баячууд барьдаг гэнэ. уг утсыг авсан хүн тусгай үйлчилгээ эдлэх эрхтэй болдог ажээ. Тус үйлчилгээ нь дэлхийн аль ч улсад үйлчлэх V.I.P үйлчилгээ бөгөөд хүссэн цагтаа дэлхий даяар хамгийн өргөн хэрэглэгддэг найман орны хэл дээр аялал, үзвэр үйлчилгээ, онгоц болон галт тэрэгний тийз захиалгын үйлчилгээ зэргийг хүлээж авах боломжтой болдог юм байна.

Эх сурвалж: http://www.shudarga.mn/news/16789.html