“Алдаа мадаггүй арван хуруу тэгш, сул талгүй сумны мөс мэт тэгш шулуун хүн энэ орчлонд үгүй. Хүн бүр өөрийн гэсэн сул талуудтай алдах тавиланд төрсөн. Юунд ч алдахгүй байх нь гагцхүү бурхны шинж чанар…”  хэмээн Н.Багабанди “Титэм үг” номдоо бичжээ. Хүн бүр л амьдралдаа ямар нэгэн байдлаар алдаа гаргасан байдаг.  Гагцхүү алдаа гаргасныхаа хариуд зарим нь эрх чөлөөгөө хасуулж, өргөст торны цаана хоригдож буй. Хэдийгээр хийсэн хэргийнхээ үйлийг эдэлж торны цаана суудаг ч энэ хаалгыг татсан гэхээрээ муу, муухай хүн биш байдаг.

Үүний нэг жишээ болох саяхан хорих 429 дүгээр ангийн хүмүүжигч А.Төрмандах өөрийн нэг сарын хугацаанд ажиллаж олсон цалингаа Эрүүл мэндийн яамны харьяа Хүүхдийн төв сувилалд хандивласан байна. Тэрбээр хорих 429 дүгээр ангийн үйлчилгээний албанд ажилладаг бөгөөд цагийн 1250 төгрөгийн урамшуулал авдаг юм байна. Өнгөрсөн дөрөвдүгээр сарын цалин 128.500 төгрөгийг сайн үйлсэд хандивлахаар зориглож хамт хоригдож байгаа хүмүүжигч П.Болдбатын бичиг баримтын зардалд өөрийн хүсэлтээр 18.500 төгрөгийг, Хүүхдийн төв сувилалд үлдэгдэл 110.000 төгрөгийг хандивлах шийдвэр гаргажээ. Эрхээ хасуулж, нийгэмээс тусгаарлагдсан ч эхр чөлөөтэй амьдарч яваа зарим нэгнээс илүү хүн чанартай хүнлэг нэгэн байгаа нь сайхан.

Эх сурвалж: Шуурхай.мн