Нийслэлийн Баянзүрх дүүргийн нутаг дэвсгэрт Шар хадны эцсийн автобусны буудлаас 300 метр зайд хүн амины ноцтой хэрэг гарчээ. ЦЕГ-аас энэ талаар өнөөдөр албан ёсны мэдээлэл өгсөн юм.

Энэ сарын 8-ны баасан гаригийн орой 20.00 цагийн үед овоонд чулуугаар булж орхисон хоёр эмэгтэйн цогцос олджээ. Тэднийг зэрлэгээр хөнөөсөн буюу толгой, гар хөл нь тасарсан байдалтай байжээ. Хохирогчид 19, 20 настай бөгөөд Өвөрхангай болон Ховд аймгийн харъяат байсан байна.

Энэхүү онц ноцтой аллага үйлдсэн сэжигтэн болох 23 настай И, З нарыг 48 цагийн дотор баривчилсан бөгөөд И нь хэргээ хүлээжээ. И нь эрхэлсэн ажилгүй, нэг ах, хоёр эгчийн хамт амьдардаг, өмнө нь нэг сарын баривчлан саатуулах ялаар шийтгүүлж байсан нэгэн гэнэ. Тэд тавдугаар сарын 6-ны шөнө 00.00 цагт уг хэргийг үйлдсэн болох нь мөрдлөгийн явцад тогтоогджээ.

Хэргийг тодруулбал, энэ сарын 06-нд хохирогч, сэжигтэн нар хамт архидан согтуурсан бөгөөд 00.00 цагийн үед БЗД-ийн 9-р хороонд байрлах сэжигтэн “З” нд ирж хоол идсэн үүний дараа сэжигтэн “И” гэгч нь хохирогч болох “Б”, “Х” нарыг дагуулж гарч Баянзүрх дүүргийн 9 дүгээр хороо “Хар хошуу” гэх нэртэй уулын хажууд очиж архидан согтуурч улмаар маргалдан хохирогч “Б”, “Х” нарын амь насыг нь хөнөөсөн болох нь сэжигтэн “И” мэдүүлэг, хэргийн газраас олдсон эд мөрийн баримтаар тогтоогдож байна. Хохирогч, сэжигтэн нар урд нь бие биенээ таньдаггүй байсан бөгөөд тус өдөр сэжигтэн “З” дамжуулж танилцсан болох нь тогтоогдож байна. Тус гэмт хэргийг үйлдсэн гэж сэжиглэгдэж байгаа “И” болон хамт архидан согтуурсан “З” нарыг Урьдчилан хорих 461 ангид цагдан хорьж хэргийг шалгаж байна

Мөн албаныхны мэдээлж буйгаар нэг цогцосны гар, хөлийг нь олсон ч нөгөө цогцосны толгойг олоогүй байгаа гэнэ.

Эх сурвалж: Шуурхай.мн