Шар хадны эцсийн автобусны буудлаас 300 орчим метр зайнд үргэлжилсэн уул харагдаж байна. Айлууд хаяа дэрлэж буусаар хороолол үүсгэчихжээ. Цогцсууд олдсон Шар хад ууланд хэлмэгдүүлэлтийн үед лам нарыг цаазалж байжээ. Тиймээс догшин лус савдагтай уул гэлцдэг юм байна. Эх сурвалжийн хэлж буйгаар нэг цогцос нь толгойгүй, нөгөө нь хөл гаргүй байсан гэнэ. Цагдаа нар цогцосны ойролцоогоос хөл, гарыг нь олсон гэнэ. Харин нөгөөгийн толгой нь олдоогүй бололтой. Шар хад уулан дээр цагдаа нар олноороо гарсан байлаа. Хоёр гурваараа салж ямар нэг юм эрж хайж уулын хормойгоор сүлжиж алхана. Хороолол дундуур ч цагдаагийн машин энд тэндгүй холхино. Тэд хоёр цаг орчим эргүүл хийж байгаад явцгаав. Баасан гаригт энэ хэсгийн бүх дэлгүүрийг хаасан гэнэ. Зарим айлын хашааг бүсэлж хүн оруулж, гаргахгүй байсныг ч иргэд хэллээ. Харин уржигдраас хөл хорио арай суларсан бололтой. Биднийг очихын өмнөхөн цагдаа нар захын айлын жорлонгоос нь ямар нэг юм хайж хогийг нь онгичжээ. Тэгээд зогсохгүй оюутан хүүг нь “Тодруулах юм байна” гэсээр аваад явсныг гэрийн эзэн дуулгалаа.

Ноцтой хэрэг гарсныг дуулсан иргэд ихээхэн айдастай байгаа бололтой “Өглөө оройд эмэгтэй хүмүүс ганцаараа явахад аймшигтай болжээ. Хэн ч яаж ч мэдэх нь” гэх хүн олон таарав. Ингэж явсаар цагдаад анх дуудлага өгсөн эмэгтэйн гэрийг оллоо. 50 гаруй настай тэрээр нэлээд цочирдсон нь илт. Нэрээ нууцлахыг хүсээд ингэж ярьсан юм.

-Таныг анх цагдаад дуудлага өгсөн гэж сонслоо. Хохирогчдыг олсон газар танайхаас холгүй бололтой?

-Уржигдар /пүрэв гариг/ оройхон нар жаргах үед малаа харахаар хажуу уул руу гарсан юм. Бараг 20:00 цагийн үед байх. Гэтэл үс, цус харагдахаар нь  “Уул, овоон дээр хэн нь ийм юм хаядаг байна” гэж бодоод цааш алхсан. Гэтэл овооноос мухар хүзүүтэй, сонин улаан юм цухуйж байсан.  Одоо байтлаа малын махаар овоогоо тахидаг болоо юу гэж бодтол юун мал манатай. Эмэгтэй хүний бие байсан юм билээ.

-Та тэгээд шууд цагдаад дуудлага өгсөн үү?

-Амьд явах насандаа тийм аймшигт юм харж байгаагүй. Нүдэндээ ч итгээгүй. Гэрээсээ хүүхдүүд явуулж харуулсан. Тэгээд л хүн байна гэж мэдэцгээгээд цагдаа дуудсан.

-Шар хад уулыг догшин гэлцэх юм. Гэтэл бүр овоон дунд цогцос байсан гэсэн үг үү?

-Хадаг самбай болсон овоон дороос тэр зүйл цухуйж байсан. Овооны чулуугаар булсан юм шиг байна лээ. Хэд ч хоносон  юм. Цагаан сүүгээ өргөдөг овооноосоо ийм зүйл харсан нь үнэхээр аймшигтай. Дулааны улиралд хүүхэд, хөгшид бид чинь энэ уулан дээрээ л гарч нар, салхи үздэг байсан. Одоо уул руу алхах хүн ч олдохгүй биз.

Бүсгүй хүнийг ийм хэрцгийгээр хөнөөсөн хэргийг монгол хүн үйлдэхгүй гэх иргэд ч таарч байлаа. Түүнчлэн ууландээрээс гэмтэл авсан эрэгтэй хүн олдсон тухай ч ярьж байв. Хохирогчид 22, 23 насны эмэгтэйчүүд байсан төдийгүйШар хад орчмын иргэд байсан гэх. Цагдаагийн байгууллагаас хэргийн тухай тодруулахад “Одоогоор хохирогчоор хоёрэмэгтэйг тогтоогоод байна” гэхээс өөр мэ­дээлэл өгөхөөс татгалзав. Ийм ноцтой хэргийг хэн, ямар сэдлээр үйлдсэнболох нь одоогоор тодорхойгүй байна.

Б.ЗАЯА