Хошин урлагийн “акул”-уудын нэг алаг нүдэн И.Одончимэг анхны нөхрөөсөө хойш олон жил өрх толгойлсон эмэгтэй байсаар хамтлагийнхаа Бархүү хэмээх залуутай гэр бүл болж хөөрхөн охинтой болоод нэлээд хугацааг үдсэн. Өөрөөсөө 16 насаар дүү залуутай гэр бүл болж байхдаа хэвлэлээр нэлээдгүй шуугиан тарьж олон хүний амны бай болж байсан ч өдгөө үлгэр жишээ гэр бүлийн тоонд зүй ёсоор багтаж явдаг билээ. Тэрээр анх жүжигчин Бархүүтэй гэр бүл болох үедээ олны хэл ам, доромжлол зэрэг хэцүү үе байсан тухайгаа нэгэн хэвлэлд өгсөн ярилцлагынхаа үеэр дурджээ. И.Одончимэг хэлэхдээ “Олон хүн янз бүрийн л яриа хөөрөө гаргаж байлаа. Бас л шуугиан дунд, олны хэл ам, доромжлол дунд явсаан. Хэцүү байсан үе бий. Үүнийг би юуг нь нуухав. Гэвч бид хоёрын хайр, итгэлд тэр бүхэн хэрхэн нөлөөлөх билээ. Цаг зуурын юм байдаг шүү дээ, үнэндээ. Жаахан тэсчихэд болдог. Бид хоёр гэр бүл болсноор нийгэмд ямар ч хор хохирол учруулаагүй биз дээ. Сайхан л амьдарч байна. Хүмүүс “Ээ мөн тэнэг хүүхэн юм аа, удахгүй чи хаягдана” гэж хэлж байлаа. Бархүүтэй ханилснаар надад алдсан зүйл байхгүй. Харин ч би хожсон гэж боддог. Хүсч мөрөөдөж явсан хөөрхөн охинтой боллоо. Ганц юм л хүмүүст таалагддаггүй шиг байгаа юм. Тэр нь Бархүүгээс олон насаар эгч юм байна л даа. Харин нэг зүйлийг бардам хэлэхэд, би хүний нөхрийг салгаж, олон хүүхдийн нулимс барж энэ хүнтэй ханилаагүй. Ер нь тийм санаа бодлоор Бархүүг сонгосон. Миний насны хүмүүс бүгд цаанаа амьдралтай, үр хүүхэдтэй байгаа. Бархүүгээс өөр хүнтэй ханилсан бол нээрээ л хүүхдүүдийн нулимсыг барж, айл гэр үймүүлэх болно. Тэгэхээр надад Бархүүгээс өөр сонголт байсангүй. Энэ сонголтыг минь зарим хүмүүс хүндэтгэхгүй буруутгаж, дайрч доромжилсонд гайхдаг юм” гэв.

Эх сурвалж: Шуурхай.мн