Ний нуугүй хэлэхэд ар гэрээ орхигдуулж байна

Монгол Улсын соёлын тэргүүний ажилтан, “Х-ТҮЦ” продакшны жүжигчин Т.Бархүүг “Уран бүтээлч” буландаа урьж, ярилцлаа.

-Тантай уулзалгүй уджээ. Өнгөрсөн ч гэсэн инээдмийн бая­рын мэнд хүргэе.
-Өө, маш их баярлалаа.

-Бэлтгэл, сургуулилт гээд их завгүй байгаа гэж сонс­лоо. “Сэрүүн хасын нууц” эмгэнэлт драмын жүжиг дахин тайзнаа тавигдахад бэлэн үү?
-Тэгэлгүй яах вэ. Жү­жиг маань бүтэн жил тог­­лог­­доогүй болохоор бэлт­гэл, сургуулилт хийх шаард­лагатай л даа. Гэхдээ өмнө нь тоглогдож байсан гэдэг утгаараа жүжигчид маань дүр тус бүрийнхээ зан чанар, шугамыг нь мэдэж байгаа.

-Жүжиг хэзээнээс тог­логдож эхлэх билээ?
-Энэ сарын 7-ноос эхлэн 10 хоног тоглогдоно.

-Таны хувьд Жиган гэх залуугийн дүрд тоглож бай­гаа. Дүрийнхээ талаар ярьж өгөөч?
-Энэ гайхалтай жүжигт тогло­сондоо үнэхээр их баярладаг. Жү­жигчин хүн бүрт олдоод байдаггүй ховор тохиол. Жүжигчнээс маш их ажиллагаа, ур чадвар шаард­сан жүжиг. Санаанд оромгүй гэнэтийн үйл явдлаар дүүрэн, хурц өрнөлтэй, үзэгчдийн зүрх сэтгэлийг догдлуулсан тийм л гайхалтай жүжиг.
Өөрөөр хэлбэл хүний амьдралд тохиолддог хайр дурлалын тухай өгүүлнэ. Хайр дурлалын ээдрээ зангилааг хэрхэн тайлах вэ, тэр бүгдийг залуусын хайр сэтгэлээр дамжуулан харуул­сан. Үнэндээ хэн ч зовохыг хүсэхгүй. Муу муухай амьдра­хыг бодохгүй. Хүн аз жаргалын төлөө л явдаг. Чи бод доо. Хүүхдээс “том болоод ямар хүн болох вэ” гэж асуухад дандаа л “дарга болно” гэж хариулдаг биз дээ.

-Тийм шүү?
-Миний дүр тийм л хүн. Сайн сайхан амьдрахыг хүс­сэн нэгэн. Гагцхүү сай­хан бүсгүйг авааль гэр­гийгээ болгосноороо түүний амьдрал орвонгоороо эргэ­дэг. Анхандаа ямар хүн байв. Яваандаа ааш зан нь эвдэрч, эцэстээ ямар хүн болов. Энэ бүгдийг жүжгээс маань харах боломжтой. Өөрөөр хэлбэл тэр хэзээ ч ийм амьдралыг сонгохгүй байсан. Ёстой л амьдралын төөргөөр Шүэ Ки бүсгүйтэй учирч, зовж шаналж яваа залуу.

-Уг нь “Сэрүүн хасын нууц” бэсрэг роман шүү дээ. Гэтэл бүхэл бү­тэн ро­маныг жүжгийн зо­хиолд хувиргасан гэхээр гай­хал­тай санагддаг. Ая, данг нь тааруулж жүжгийн зо­хиол болгоход хэр хугацаа шаар­дагдсан нь сонин байна л даа?
-Маш их хөдөлмөр шаардсан. Асар богино хуга­цаанд өдөр, шөнөгүй сууж жүжгийн зохиол бол­госон. Чиний бодож байгаа чинь үнэн л дээ. Бүхэл бүтэн романыг жүжгийн зохиолд хувиргах амар биш. Харин Одноо маань 7-10 хоног яс суусан. Би Одноог “Унтаач ээ, маргааш ажилтай ядар­чихлаа” гэж их ч үглэсэн дээ. /Инээв/
Үнэхээр “Аянгын бороо”-ноос илүү даацтай жүжиг тавьж чадсан. Жүжигчний тоглолт, ур чадварын хувьд ч гэсэн нэг шат ахисан. Үзэгчдийн сэтгэлийг байл­дан дагуулсан. Театрын танхим даяар уярал, үзэн ядалт дагуулсан жүжиг болж чадсан.

-Гэхдээ танай продакшн өмнө нь “Аянгын бороо”, “Хориотой жүжиг” зэрэг гайхалтай сайхан бүтээлүүдийг тайзнаа амилуулж байсан. Гэтэл яагаад заавал “Сэрүүн хасын нууц”-ыг дахин тоглох болов?
-“Аянгын бороо” бол үнэ­хээр мундаг жүжиг. Гэхдээ “Сэрүүн хасын нууц” эмгэнэлт драмын жүжиг, мэргэжлийн хувьд нэг шат ахисан бүтээл юм. Үнэндээ бид “Аянгын бороо”-ноос давсан жүжгийн зохиолыг бүтэн жил хайсан.

-Таны ярианаас тэсрэлт хийх дараагийн жүжгийн зохиолынхоо эрэлд хэдийн гарчихсан гэж ойлгогдож байна?
-Өө, тэгэлгүй яах вэ. Бид эрэл хайгуул хийгээд эхэл­чихсэн. Харин дорнын жүжиг байх эсэхийг нь хараахан шийдээгүй, ярил­цаж байна.

-Ингэхэд ойрын хуга­цаанд кино хийх үү?
-Бас л санаанд хүрсэн ки­но зохиол олдохгүй юм. Бид­ний дүр төрх, ур чадварт тохир­сон кино зохиол хайж л байна.

-Сэтгүүлч биш үзэгчийн хувьд нэг асуулт асуумаар байна. “Сэргээш-4”-ийг хэ­зээ хийх вэ?
-Үнэнийг хэлэхэд наадах асуудлыг чинь манайхан ярь­даг л юм. Тохироо нь бүрдв­эл хийчих юмсан гэж боддог.

-Тохироо нь бүрдлээ гэхэд өмнөх цувралуудаа гүй­цэх болов уу?
-Тийм ээ. Гэхдээ хийлээ гэхэд өмнөх цувралуудаа гүйцсэн байх ёстой. Өм­нө­хөөсөө шат ахиулахын тулд яаж хийх вэ гэдэг асуулт гарч ирнэ биз дээ.

-Тэр ч мэдээж. Янз нь өнөөг хэр нь асуултынхаа хариуг олохгүй яваа байх нь?
-Тийм гэх үү дээ. Тэрхүү асуултын хариу нь өнөөх л сайн зохиол. Энэ мэт саадаас “Сэргээш-4” хүлээгдээд бай­на гэж ойлгож болно.

-Урлагийн ертөнцийг хатуу, харгис гэж ярьдаг. Магадгүй уран бүтээлч хүн ямар нэгэн нандин зүйлээ зольж байж амжилтад хүрдэг байх?
-Яг үнэн.

-Нууц биш бол урлаг танаас юугаа золиослохыг шаардсан бэ?
-Наадах чинь хамгийн том асуудал. Ний нуугүй хэлэхэд ар гэрээ орхигдуулж байна. Азаар манай Одноогийн ээж бид хоёрын бүхий л ар талыг зохицуулдаг. Бараг биднээс илүү охиныг минь хайрлаж, хүмүүжүүлж байна. Биднийг “Ажлаа л сайн хий, санаа зовох хэрэггүй” гэдэг. Охин маань ч эмээдээ амь шүү дээ.

-Охин тань жигтэйхэн том болсон биз?
-Тэгэлгүй яах вэ. Бид хоёр ихэнхдээ л ажилтай байдаг. Охиноо орой унтаж байхад нь ороод, өглөө унтаж байхад нь гардаг. Ажил, ажил гээд л явна. Заримдаа бусад шиг гэр бүлээрээ сайхан ам­­ралтад явж, зугаалж, орой бүр халуун бүлээрээ ширээ тойрч суугаад хоолоо идэх юмсан гэж боддог юм. Үнэхээр цаг зав гарахгүй болохоор хааяадаа бухимдах юм байна шүү дээ.

-Ингээд бодохоор харам­саж байв уу?
-Юунд.

-Жүжигчин болсон доо?
-Үгүй ээ. Харин нь ч энэ мэргэжлийг сонгосондоо баяр­лаж, бахархдаг. Хэрэв би жүжигчин болоогүй бай­сан бол өдийд хаана, юу хийж явах байсан бол оо.

-Үнэхээр хаана, юу хийж явах байсан бол?
-Төсөөлөгддөггүй юм аа. Тиймээс энэ мэргэжлийг сонгосондоо өчүүхэн ч ха­рамсаж байгаагүй. Харин хаа­яа нэг тогтмол цагт тардаг, долоо хоногийн хоёр өдөр нь амардаг ажил хийх үзэх юмсан гэж боддог шүү.

-Хэсэгхэн ч болтугай юу?
-Яг тийм. /Инээв/

-Ярилцсанд баярлалаа.

Б.Төрбат

Эх сурвалж: