Украины Зэвсэгт хүчин “Оросын цэрэг Крымын цэр­гийн баазуудыг хяналт­даа авснаас хойш украин офицер амиа алдсан то­хиол­дол анх гарлаа” гэж мэдэгдсэн тухай ВВС мэдээл­сэн байна. Энэ хэрэг нь ОХУ-ын Ерөнхийлөгч В.Путин болон Крымын удирд­лагууд уг хойгийг нэгт­гэх баримт бичигт гарын үсэг зурсны дараахан болсон аж.

Крымыг 2014 оны гурав­дугаар сарын 18-наас ОХУ-ын улсын бүрэлдэхүүнд нэгт­гэсэн бөгөөд 2015 оны нэгдүгээр сарын 1 хүртэлх шил­жилтийн үед эрх зүй, эдийн засаг, санхүүгийн асууд­луудыг нэгтгэх ажлыг хийх юм байна. Крымын нийс­лэл Симферополь хот­ноо ажиллаж байгаа ВВС-гийн сурвалжлагч Бен Браун цэргийн баазаас ав­то­мат буугаар буудсан нь сон­согдсон гэжээ. Тий­мээс Украины засаг захир­гаа цэр­гүүдийг амиа хам­гаа­­ла­хын тулд хариу гал­­лахыг зөв­шөөрсөн гэнэ. Ба­­руу­ны орнууд Крымын хой­гийг ОХУ-д нэгтгэснийг бу­руутгаж, “Их долоо” болон Ев­ро­пын Холбоо ирэх долоо хо­ногт Гааг хотод уулзахаар төлөв­лөж байна.

Болсон явдлыг нүдээр харсан гэрч нар зэвсэглэсэн эрэгтэйчүүд тээврийн хоёр хэрэгслээр Симферополь хо­тын цэргийн баазад очиж, автоматаар галласан хэмээн ВВС-гийн сэтгүүлчид хэл­жээ. Украины засаг захиргаа “Цэргийн бааз доторх цэцэр­лэгийг хамгаалж байсан офи­цер амиа алдаж, өөр нэг офицер шархадсан. Бас нэг харуул төмөр хашлага ну­рахад цохиулан толгой, хөл нь гэмтсэн” гэж мэдэгдсэн. Түүнээс гадна Оросын цэргийн дүрэмт хув­цас өмссөн эрэгтэйчүүд хэсгийн командлагчийг ол­зол­­сон гэнэ. Харин Кры­мын Батлан хамгаалах яам­ны хэвлэлийн төлөөлөгч Владислав Селезнев “Нүүрээ халхалсан зэв­сэгтэй, үл мэ­дэгдэх этгээдүүд уг халд­ла­гыг үйлдсэн” хэмээн Ройтерс агентлагт хэлсэн аж.

Харин Украины Ерөнхий сайд А.Яценюк “Улстөрийн мөргөлдөөн одоо зэвсэгт халд­лагад шилжиж байна. Оросын цэргүүд Украины зэвсэгт хүчин рүү буудаж эхэллээ. Энэ бол дайны гэмт хэрэг” гэжээ. Тэрбээр Крымыг ОХУ-д нэгтгэж бай­гааг “Олон улсын түв­шинд хийж байгаа дээрэм. Киев энэ шийдвэрийг хэзээ ч хүлээн авахгүй. Нэг улс өөр нэг тусгаар тогтносон улсын газар нутгийг түр буудаллах хугацаандаа хул­гайлж бай­на. Орос улс олон улсын ний­­гэмлэгүүдээс тус­­­гаар­лагдлаа” хэмээн дүгнэсэн аж.

Гэвч Крымын цагдаа нар Украин болон Оросын цэргүүд хоёр талаасаа гал­лаж байсан. Украины нэг цэрэг амиа алдаж, нэг нь шархадсан. Оросын тал ял­гаагүй хохирол амссан гэж хэлсэн. Мөн Крымын хэвлэл мэдээлэл Оросын нэг цэрэг буудуулж амиа алдсан гэж мэдээлжээ. Гэхдээ энэ мэдээлэл баттай биш гэд­гийг ВВС дурьдсан байна. Симферополь хотод байгаа тус агентлагийн сурвалжлагч Марк Ловин “Цэргүүд анхааруулахын тулд агаарт хий буудаж байсан. Гэтэл энэ хэрэг гарснаар цаашид мөргөлдөөн гарах вий гэсэн түгшүүрийг бий болгож байна” хэмээн хэллээ.

Улс орнууд Крымыг нэгт­гэсэнд ОХУ-ыг буруутгаж байгаа бөгөөд АНУ, Канад, Франц, Япон зэрэг улс энэ сарын 16-нд Крымд явуулсан санал асуулгын дүнг хүлээн зөвшөөрөхгүй гэдгээ мэдэгдээд байгаа. Түү­нээс гадна ОХУ-ын эсрэг виз болон эдийн засгийн хориг арга хэмжээ тавьж эхэлсэн.

Харин ОХУ-ын Ерөн­хийлөгчийн хэвлэлийн тө­­­лөөлөгч Д.Песков ВВС агентлагт өгсөн ярилц­ла­гадаа “Хэрвээ АНУ, Евро­пын Холбоо эдийн засгийн хо­риг тавьж байгаа бол ОХУ шинэ түншүүдтэй бол­­но” гэж мэдэгдлээ. Гэх­дээ тэрбээр “Бид АНУ, Евро­пын Холбоотой сайн харил­цаатай байхыг хүсч байна. Европын Холбоо бол ОХУ-ын эдийн засаг, хөрөнгө оруулалт, худалдааны гол түнш. Тиймээс ОХУ сайн ха­рилцаагаа хадгалах хэ­рэг­тэй. Дэлхий нийт эдийн зас­гийн асуудлуудаа ОХУ-ыг оролцуулахгүйгээр хэлэлцэх нь бүрэн дүүрэн хэлэлцүүлэг болох уу” гэж тэмдэглэсэн аж.

Н.Тунгалаг

Эх сурвалж: