“Хэзээ тэр вэ, хаана, хэн тэгж байна, би лав мэдээгүй юм байна”. Энэ бол Ерөнхий сайд Н.Алтан­хуяг сэтгүүлчидтэй 30 ми­нут уулзахдаа хэлдэг үгс. Бараг л амны уншлага нь бол­чихсон гэхэд болно. Энэ уулзалтыг долоо хоног бү­рийн пүрэв гарагт хийдэг болоод удаж байна. Уг нь Засгийн газрын тэргүүн цаг үеийн асууд­лаар мэ­дээ­лэл хийж, сэтгүүлч­дийн со­­нирх­сон асуултад хариул­даг учиртай.

Гэтэл сүүлийн үед тэрбээр асуулт бүрт “Хэн тэгж байна, хаана тийм зүйл болов” гэж ирээд л асуудаг болж. Харин “тэмээ хариулсан хүн буу­рынхаа занг андахгүй” гэгчээр хэв­лэлийнхэн ч асууж буй зүйлээ цаг минут­тай нь хэ­лээд тавьчихна. Энэ үед нь мань хүн хээв нэг “Энэ асуудлыг би мэ­дэх­гүй түүнээс асуу” гээд таг болчихно. Ингэх л байсан юм бол хүний хэл ам сугалах шахам шалдаг учир нь юу юм бол.

Өчигдөр л гэхэд “Иргэд АИ-92 бензин өгөхгүй байна гэсэн гомдлыг тавьж байна” гэсэн асуултад “Хаа­на өгөхгүй байгаа юм бэ, хэзээ тэр вэ” гээд сур­сан зангаараа асуултад асуул­таар хариулах нь тэр. Ха­рин сэтгүүлч “Гачууртад зарахгүй байна. Өнгөрөгч амралтын өдрүүдэд “Маг­най Трейд”-ийн шата­хуун түгээх станцууд зараа­гүй” гэхэд наад асууд­лаа О.Магнай болон Газрын тос­ны газрын дарга Г.Өлзий­бүрэнд хэл” гэв.

Энэ 30 минут ер нь л их өгөөжтэй. Ямар сайн­даа ард түмэн энэ 30 ми­нутаар л өндөг өдөр тутам хэрэглэдэг хүнс биш, тансаг хэрэглээ гэдгийг мэдэж авсан. Тэ­гээгүй бол бүгдээрээ бая­чууд шиг өглөө бүр өндөг иднэ гэж дайраад балрахгүй юу. Ерөнхий сайд л ингэж хэлж өгч байж ойлгосон. Тэгээгүй бол эдийн засаг хүнд байгаа өнөө үед хэцүүдэхгүй юу.

Хааяа бас хийж буй аж­лаа рекламдана. Өчигдөр л гэхэд ТҮЦ машиныг тул­тал нь сурталчлаад авсан. Тодруулбал “ТҮЦ машин төрийн хүнд суртлыг арил­гасан.

Өнөөдөр “Буянт-Ухаа” хо­­рооллын захиалгыг үүгээр авч байгаа нь маш сайн хэрэг. Хэрвээ тэгээгүй бол өдийд бараг зодоон болж байгаа” гэж байна. Яах вэ, манайхан дараалал дундуур дайрдаг нь үнэн. Хэзээнээсээ л хар үүрээр талханд дугаарлаж, хаалга нээгдэх үед далайн түрлэг шиг дайраад сурчихсан юм чинь.

Гүйцэтгэх засаглалын тэргүүн гэнэ гэнэхэн гэмтэй үг хэлчихээд байдаг сул талтай. Өнгөрөгч намрын чуулганаар төсөв батлах үед “авлигажсан” гэж хэлээд дайн дэгдээх шахсан. Харин энэ удаад “ТҮЦ машин төрийн хүнд сурт­лыг арил­гачихсан” гэж байгаа нь угаасаа л манай төрийн албаныхан айхтар хүнд сурталтай гэдгийг хүлээн зөвшөөрчихөж байгаа юм. Үүнээс нь болж хүмүүс дахиад л элдвээр хэлэх вий дээ. Хааяа өмнөөс нь санаа ч зовох шиг. Гэхдээ бас зарим нэг иргэний хурууны хээг танихгүй байна лээ шүү Ерөнхий сайд аа. Эсвэл төв шууданд байрлах ТҮЦ машинаас хорооны тодор­хойлолт авах гэж мунгинаж зогссон эгч гараа угаагүй, эсвэл хуруугаа эсгэсэн ч байж магадгүй л юм.

Өмнө нь сурагчийн дү­рэмт хувцсыг нь ард иргэд нийтээрээ эсэргүүцэж байхад Ерөнхий сайд л өөрийн 30 минутынхаа үеэр танилцуулж намжаасан. Одоо энэ талаар ам уралдан муулж байсан хүмүүс таг чиг.

Түүнчлэн Ерөнхий сай­дыг шударга бус явдлыг тэвчиж чаддаггүйг нь өчиг­дөр мэдлээ. Учир нь тэрбээр оюутнууд автобусанд үнэгүй зорчоод сурагчид 200 төгрөг төлж явдагт сэтгэл нь эмзэглэж явдаг гэнэ.

Тиймээс хотын дарга Э.Бат-Үүлийн дэвшүүлсэн нийтийн тээвэрт ухаалаг систем нэвтрүүлэхийг дэм­­­­жиж байгаа юм байх. Ин­гэс­­нээр нийтийн тээв­рээр үнэгүй зорчдог иргэдэд зориулсан 53 турбум төг­рөгөөс сох дутдаг 15 тэрбум төгрөг гарч ирнэ гэж үзэж байгаа аж. Үүнийг сонссон зарим нь “Оюутнууд Ерөн­хий сайдаас 70 мянгаа нэ­­хэж мессэж бичээд дур­гүйг нь хүргэчихэж. Уг нь сон­гуулийн насны хүүх­дүүдэд ингэж ханд­мааргүй юм” гэж байх юм хэн мэдлээ.

30 минутад дуулгасан бас нэг мэдээ нь зам барих ажилтай холбоотой байв. Энэ нь Зам, тээврийн сайд А.Гансүхийн “Энэ жил 1800 км автозам барих ёстой ч санхүүжилтгүйгээс болоод энэ ажил явахгүй байна” гэх үгийг үгүйсгэсэн юм.

Тодруулбал энэ жил баригдах зарим замын ажил төсөвт мөнгө нь суугаагүйн улмаас гүйцэтгэх эзэнгүй хэвтэж байгаа аж. Үүнийг шийдэхийн тулд мөнгөтэй компанид өгч хийлгэх юм байна. Харин дараа нь мөнгөтэй болохоороо өгчихнө, энэ ажлыг Эдийн засгийн хөгжлийн яам хариуцана гэж байна.

Үүнээс харахад Эрүүл мэндийн сайд Н.Удвалын хэлдэг ортой бололтой. Зам, тээврийн сайд мөнгөгүй гээд ажлаа хийхгүй байхад Ерөнхий сайд яаж ийж байгаад хийнэ гэж байгаа нь яалт ч үгүй төрөлхийн ажилсаг хүний чанар. Харин үүнийх нь гороор Эдийн засгийн хөгжлийн сайд Н.Батбаяр мөнгө олж, бадар барих гэж багагүй сандрах бололтой шүү.

Гэхдээ ганцааранг нь суулгаж байгаад бүтэн 30 минутын турш байцааж байгаа юм шиг хэдэн та­лаас нь юм асуугаад “Тэгсэн биз дээ” гээд дайраад байхаар хэцүү байдаг байх даа. Тэгээд л зарим хүний асуусан асуултад “Би наадхыг чинь хариулахгүй. Угаасаа надад хамаагүй” гэж уцаарладаг биз.

Ямар сайндаа л заримдаа бүр “За тэгээд маргааш нөгөө Н.Алтанхуяг ингэж хэлсэн гээд баахан юм биччих вээ” гэж сануулж байх вэ дээ. Хэдэн талаас нь дайраад их л сандаргадгийн шинж. Аягүй бол сандраад зүүдээ ярих гэж байгаад…

М.Санчир

Эх сурвалж: